Норвешка утре целосно ќе ги укине мерките против ковид-19 кои ги ограничија социјалните контакти и го блокираа голем дел од економијата.
Ова е 561 ден откако ги воведовме најстрогите мерки во Норвешка во мирно време. Сега е време да се вратиме на нашата вообичаена рутина, изјави премиерката Ерна Солберг на прес-конференција.
Ограничувањата за коронавирусот ќе бидат укинати утре од 16 часот по локално време. Одлуката повеќе да не се бара физичка дистанца ќе овозможи на културните и спортските места во Норвешка да работат со полн капацитет, рестораните повторно да бидат полни, а ќе се отвораат вратите и на ноќните клубови.
Солберг веќе заврши три од четирите фази во владиниот план за постепено укинување на социјалните и економски ограничувања што беа воведени од март лани. Сепак, почетокот на последната фаза беше одложен неколкупати поради стравувањата од можно зголемување на бројот на заразени лица.
Накратко, сега можеме да живееме нормално. Сакам да кажам, многу ти благодарам Норвешка, нагласи Солберг и додаде
Иако повеќето луѓе сега се враќаат во нормалото секојдневие, пандемијата не е завршена. Луѓето ќе продолжат да се разболуваат, па затоа е важно сите да бидат вакцинирани
Според Националниот институт за јавно здравје, околу 76 проценти од Норвежаните досега биле вакцинирани со најмалку една доза на вакцината против коронавирус, а 67 проценти од населението се имунизирани со две дози.
Солберг истакна дека луѓето кои ќе се заразат со коронавирус, ќе мора да се изолираат за да не го шират вирусот.
Таа нагласи дека ограничувањата за патување, исто така, се олабавуваат и Владата повеќе нема да им препорачува на граѓаните да не патуваат надвор од Европа.