Владата бара од Комисијата за заразни болести (КЗБ) дополнителни анализи и компаративни студии за предложените мерки, но и предлози за дополнителни мерки за поттик за масовна вакцинација. На надлежните институции им наложи да ги спроведуваат веќе донесените анти-ковид мерки, како и скрининг за утврдување на процентот на вакцинирани во јавната администрација.
Во очекување на дополнителните анализи, Владата ги задолжи ресорните министерства и инспекциски служби да ги вложат сите капацитети за зајакнување на примената и контролата на спроведување на сите активни мерки за заштита од ковид-19, а особено на системот на проверка на сертификатите за вакцинација, ПЦР тестовите и потврдите за прележана инфекција со ковид-19 низ ригорозна проверка на идентитетот на лицата кои ги прикажуваат овие документи за пристап во објектите каде што е тоа задолжително.
Во насока на поттик за масовна вакцинација, Владата ги задолжи сите министерства, јавни претпријатија, акционерски друштва и агенции во државна сопственост, да спроведат скрининг за да се утврди процентот на вакцинирани во државната и јавната администрација, како и да ги утврдат можностите за стимулација за поголем до целосен опфат со вакцинацијата, како и правната основа за рестрикции на правото на дежурства, прекувремена работа, службени патувања и други опции за дополнителни приходи за вработените во јавната администрација, извести синоќа Владата по одржаната седница.
Таа ќе ги разгледа и употреби сите реални можности за економски стимулации, но и за рестрикции по однос на финансиски бонуси и друг тип на надополнувања кои се надвор од основиците, со цел да ги мотивира и упати граѓаните кон единствената и најефективна мерка за заштита на здравјето и за спас на сопствениот живот од опасната пандемска болест ковид-19.
Во претходното деноноќие беа регистрирани нови 473 случаи на ковид-19 од направени 2.708 тестирања или 17,4 отсто, што е за пола процентен поен повеќе од максималната позитивност во текот на минатата недела, која, според Институтот за јавно здравје се движела од 11,6 до 16,9 отсто, а просечно 14,8. Вчера беа евидентирани и вкупно 18 починати, 14 во претходното деноноќие и четворица пријавени преку системот „Мој термин“ со датум на смрт од претходните денови. Евидентирани беа и 505 оздравени пациенти. Бројот на активни случаи вчера изнесуваше 8.289.
Досега во земјата се направени вкупно 1.458.731 милиони тестирања на ковид-19. Вкупната бројка на ковид-дијагностицирани лица во нашата земја од почетокот на епидемијата изнесува 213.779, бројот на оздравени пациенти е 197.998, а на починати е 7.492.
Според епидемиолошки анализи, најмногу активни случаи во моментот има во Скопје и тоа 3.845, пред Битола – 673, Прилеп – 421, Велес – 357, Кавадарци – 301, Охрид – 274, Куманово – 273, Кочани – 204 и Штип – 202. Во другите градови бројот на активни случаи е под 200. Дебар е град без ниту еден позитивен случај на ковид-19.
Досега во државата се вакцинирани 48 отсто од полнолетните граѓани.