Различни се перцпециите на претставниците од власта и од опозицијата за надворешната политика на Македонија по промената на власта, во поглед на патот кон НАТО и Европската Унија.
Изјавите на министерката за одбрана, Радмила Шеќеринска и на поранешниот министер за надворешни работи, Никола Поповски, дадени пред почетокот на конференцијата „Приказната за европската интеграција на Македонија 2.0“, се разликуваат во тоа што политиките кон Бугарија и Грција пред четири месеци и по новата власт, едните велат дека се позитивни, другите дека се сервилни кон соседите.
„Има работи кои зависат од Македонија и работи кои зависат од она што се случува во рамките на Европска Унија. Нашата цел е да ја претставиме Македонија во позитивно светло. За не ја упропастиме и втората шанса која ни се укажува, треба да учиме од лекциите од изминативе 11 години кога Македонија не мрдна од место а државите од регионот направија сериозни реформи и кон НАТО и кон ЕУ. Сите грешки од тој период сега треба да ги поправаме, а тоа подразбира, сите уставни контролни механизми да функционираат, да обезбедиме контрола врз извршната власт, да обезбедиме крај на сите злоупотреби врз прислушувањето и корупцијата, како и владеење на правото. Сето ова е предвиддено во Планот 3-6-9 на сегашната влада“, изјави денеска Радмила Шеќеринска.
Според неа, Брисел сега има друга реторика кон Македонија, и позитивни работи се слушаат за државата во рамките на европското семејство.
„Таму (Брисел) слушнав дека Македонија ги отвора вратите и дека за прв пат Македонија ја гледаат како држава која повеќе не се жали дека другите и се криви и дека самата знае да си ги решава проблемите. Долго време Македонија чекаше друг да и ги реши проблемите, а изминативе четири месеци покажавме дека знаеме да ги решаваме проблемите со своите соседи. Со сите наши соседи сега водиме зрела политика и отворени сме, преку европско однесување да ги решаваме проблемите“, потенцираше таа.
За Никола Поповски пак, политиката која сегашната влада ја води, остава впечаток на несигурност, и се однесувала сервилно.
„Изминатиов период интензивно се работеше да се создаде перцепција дека се случуваат сериозни реформи, а сметам дека таа успеа и да се изгради. Владата вети сеопфатен процес и вклученост, но освен што се постигна да се создаде таква перцепција, сериозно не е така.
За еден краток период од четири месеци, многу работи во инвестициската политика, во јазичните политики, во економските и други, се создава чувство на несигурснот и на создавање на основа за продолжување на таква несигурност. Таквиот пат треба да се корегира“, порача Поповски.
Тој се наврати дека и додека ВМРО-ДПМНЕ управуваше со државата, во поглед на образованието тие имале предвидено дека има простор за градење мостови, но со поинаква тенденција.
„Доколку тенденцијата е да се создаде еднострана основа за ревидирање на македонски учебници од надвор, тогаш излегуваме од концептот за реципроцитет и во тој случај и наметнуваме потреба за Македонија да биде портретирана како страна која креира проблеми. Впечатокот кај нашите соседи е дека нема непристоен предлог кој би дошол од надвор до нашата влада, а кој таа не би прифатила. Треба да излеземе од матрицата во која некој друг од надвор ни ги сервира напишани текстовите а ние само ги прифаќаме преку владините претставници“, рече поранешниот шеф на македонската дипломатија.
Целта на денешната конференција организирана од Институтот за европска политика (ЕПИ), сепак како што рече директорката на ЕПИ, Симонида Кацарска, е да се излвлече поука дека а власта и опозицијата треба заедно да работат за да постигнат резултати, особено откако челните луѓе на Европската Унија порачаа дека земјите од Западен Балкан имаат сериозни шанси да станат полноправни членки на Унијата.
„Во моментов препораката за отпочнување преговори е условена од реформите и од името. На првото мора Македонија да направи исчекор. Ако ги испорачаме реформите тогаш ќе може да одземеме од некои од аргументите на Грција за второто прашање. Позитивен момент сепак договорот за добрососедство со Бугарија“, подвлече Кацарска.
За втората шанса на Македонија на патот кон Европа, на форумот денеска се разговара во два панели, за тоа колку е возможно новата влада да воспостави одржливи реформи.