Квотите за увоз на челик и алуминиум што ги воведува Европската Унија не се очекува значително да влијаат врз македонската индустрија. Од Владата велат дека можеби нема да има спектакуларен раст, но нема да има ни пад во индустријата во однос на последните пет години.
Вицепремиерот за економски прашања Кочо Анѓушев вчера на гостувањето во емисијата „Топ тема“ на Телма изјави дека квотите што ги воведува Европската Унија се со цел да го заштити своето стопанство од нелојалната конкуренција и оти тоа нема да предизвика пад на македонската економија. Појасни дека македонските компании ќе можат да извезуваат челик по правилото, кое предвидува на просекот од последните три години, да се додадат дополнително пет отсто. Тука, вели Анѓушев, не станува збор за намалување, туку за зголемување од пет проценти.
Според Анѓушев, најпогоден би бил „Макстил“ бидејќи изминатите години за компанијата биле „лоши“ и поради тоа ќе мора да извезува толкава количина.
Поради квотите за извоз на челик и алуминиум, неколку македонските фабрики се пожалија дека им се ограничени можностите за пласман и оти дека ќе бидат принудени да ги испратат работниците на принуден одмор.
Од Здружението на металургијата при Стопанската комора на Македонија вчера укажаа дека ваквите ограничувања на увозот во ЕУ, во отсуство на други алтернативни решенија (близу 90 отсто од извозот на метални цевки од РМ се реализира во земјите од Европската унија и во моментов не постои алтернативен пазар за пласман на овие производи), создаваат сериозни проблеми пред договарањето на комерцијалните зделки на подолг рок, ги доведуваат во прашање почнатите и предвидените инвестициски вложувања и може да предизвикаат одредени проблеми со ангажираноста на вработените лица.
Вицепремиерот за европски прашања Бујар Османи на брифингот со новинарите во неделата потврди дека е пристигната формалана нота од Европската комисија, според која, од идната година за македонските компании ќе важат новите мерки за ограничен извоз во ЕУ.
Спорeд Европската комисија, откако ќе се исполнат квотите за увоз на челик и алуминум, царината ќе се зголеми за 25 проценти.
Според Османи на ваков начин, штетата за македонското стопанство би била 100 милиони евра.
Од опозициската ВМРО ДПМНЕ вчера ја обвинија власта дека со тоа што не успеала да преговора со ЕУ за изземање на Македонија од овие квоти, ќе предизвика штета од 200 милиони евра, а 5.000 лице ќе останат без работа.