СДСМ го обвинува ВМРО-ДПМНЕ за говор на омраза и повици за линч на вчерашниот протест пред Државната изборна комисија, а власта вели дека тоа вчерашниот протест бил најпатриотски и достоинствен протест.
„Синоќа бевме сведоци на фашистички изјави пред ДИК кои покажуваат дека раководството на ВМРО-ДПМНЕ посакува сценарио за судир меѓу граѓаните, за Груевски да си ја спаси сопствената кожа. Тоа нема да им помине. Граѓаните на Македонија не се ничие топовско место. Нема да подлегнат на провокациите.
Ги повикуваме сите што гласаа за промени, но и на оние кои беа приморани својот глас да го дадат за режимот, да не подлегнуваат на провокации“, пишува во реакцијата на СДСМ.
Од партијата ги повикуваат граѓаните да останат спокојни, затоа што режимот заминува, а државата и институциите ќе бидат целосно ослободени.
Од ВМРО-ДПМНЕ пак велат дека СДСМ синоќа имала можност да види како изгледа достоинствен, патриотски протест.
„СДСМ имаше прилика да види како изгледа кога граѓаните го користат демократското право на протест за да го одбранат врвното право на глас и одлучување за својата иднина, за разлика од вандалите и платениците на СДСМ кои уништуваа државен имот, повредуваа полицајци и сквернавеа споменици на македонската држава. СДСМ не е демократска партија и не го разбира концептот на одлучување на мнозинството и сака да ја окупира државата без поддршка од мнозинството народ и да се однесува фашизоидно како што се однесуваше и минатите двеипол години“, одговараат од ВМРО-ДПМНЕ.
Од партијата додаваат дека СДСМ реши да ја втурне Македонија во криза, а истото сака да го повтори и овој пат после десеттиот пораз по ред.
„Нема да им помине. Граѓаните нема тоа да го дозволат“, наведено е во соопштението.