Заев: Ако Мицкоски се грижеше за здравјето на граѓаните, немаше да ги крши мерките

„Не му е првпат на лидерот на опозицијата да покажува, ем со зборови, ем на дело, незрело и неодговорно однесување во врска со пандемијата. Не му е првпат на лидерот на ВМРО-ДПМНЕ да не ги почитува мерките и дрско да лаже и да ја манипулира јавноста во врска со тоа. Но, неговите лаги се плитки, на неговите лаги им се куси нозете“, напиша Заев.

Како што никој не веруваше во приказната за мали деца за „отсјајот во теретаната“, наведе Заев, така сега никој не верува во приказната дека лидерот на опозицијата не бил информиран доволно за новите протоколи.

„Па, како е можно да не бил информиран, кога министерот за внатрешни работи постојано кажува дека редовно го информира својот шеф за сите одлуки и мерки на Владата? – Како е можно Мицкоски да не знаел дека неговата „средба со познаници во една скопска кафеана“ е арогантно кршење на правилата за заштита на здравјето? – Граѓаните со право го осудуваат незрелото, лицемерно, непринципиелно и неодговорно однесување на политичарите како Мицкоски. Граѓаните знаат дека неговото извинување е лажно. За неговото грубо кршење на здравствените мерки тој ја обвинува власта, небаре власта го однесе во кафана во време на забрана. Наместо искрено да се извини и да ги повика граѓаните да ги почитуваат мерките што тој ги прекрши, се одлучил власта да му биде крива. За политичари кои дрско, арогантно и безобразно кршат здравствени протоколи, не треба да има место во политиката. Политичари кои дење лицемерно глумат дека се загрижени за здравјето на граѓаните, а навечер ги кршат здравствените мерки, привилегирани политичари кои мислат дека теретаните и кафаните треба да бидат отворени само за нив, ќе добијат силно НЕ од граѓаните“, порача Заев на Фејсбук.