Амбасадорот Чарлс Гарет и британскиот министер за Европа и Америка, Алан Данкан од штабот на ВМРО-ДПМНЕ заминаа во партиското седиште на СДСМ.
По средбата, која траеше еден час, двајцата дипломати не сакаа да дадат изјава, ниту да коментираат нешто за состанокот со образложение дека ќе задоцнат на следниот состанок.
Засега нема информација со кого од партијата на Никола Груевски се сретнале дипломатите, ниту пак за што се разговарало на средбата.
Посетата на дипломатите доаѓа откако ДУИ објави дека се надминатите разликите околу употребата на албанскиот јазик и од утре ќе почне да се договара програма за новата влада со СДСМ, а лидерот на СДСМ, Зоран Заев денеска најави дека владата ќе се формира на почетокот на март. По средбата во ВМРО-ДПМНЕ, дипломатите ќе одат на средба во партиското седиште на СДСМ.
Вчера претседателот на ВМРО-ДПМНЕ, Никола Груевски изјави дека СДСМ и ДУИ се обидуваат да направат „дефакторизација“ не само на Македонците, туку и на Турците, Србите, Власите, Ромите и на другите националности и дека ВМРО-ДПМНЕ ќе стојат цврсто на „браникот и одбраната на државата и националните интереси“.
„Таа „дефакторизација“ нема да ја дозволиме. Она што, исто така, го гледаме е дека СДСМ се обидува на некој начин да се натпреварува сам со себе колку повеќе ќе им даде на албанските партии и се поставува прашањето до кога така. До кога со тоа давање, дали до моментот до кога нема да остане ништо во државата за давање и ќе се загуби сето она што е стекнато со многу труд, со многу крв и сo многу напор“, изјави Груевски.
Претседателот на ВМРО-ДПМНЕ нагласи дека тоа што сега од СДСМ тврдат дека Уставот нема да се менува е само заради фактот што, како што рече, знаат дека тој без ВМРО-ДПМНЕ не може да се менува.
„И тука ќе останеме цврсто на бедемот на одбраната на државните и на националните интереси во која било форма и во која било ситуација – рече Груевски