Офанзивно и напаѓачки наместо дефанзивно и со дигнат гард, да се постигне гол, да се забележи било каква победа за реваншот во Данска наредната седмица. Ова се желбите на Вардар пред вечерашниот прв дуел против Копенхаген во третото коло квалификации за УЕФА Лигата на шампиони. Мечот на „Телеком арена“ почнува во 20 часот. Правда ќе дели судиска тројка од Германија предводена од Даниел Зиберт кому ќе асистираат Јан Зидел и Ласе Кословски.
„За класа се подобри од Малме и, речиси, секоја година играат во групите во натпреварувањата на УЕФА и го имаат нашиот респект. Но, ние сме фокусирани и на нашата игра со цел да извлечеме добар резултат пред реваншот во Данска. А, тоа е можно ако нападнеме. Се надевам дека ќе успееме да победиме, па макар и со еден гол разлика за што треба да бидеме на ниво од второто полувреме во Струмица со Швеѓаните“, коментира Бобан Грнчаров, капитен на „црвено-црните“ и стрелец на еден од трите гола на стадионот „Младост“ во претходната рунда.
Вардаровиот стопер се осврна и на противничките играчи и на предизвикот што го очекува вечерва во Скопје.
„Копенхаген е добро анализиран овие денови. Неговите напаѓачи се високи што, на некој начин, е предност за нас дефанзивците. Верувам дека ќе успееме да се носиме во дуелите и на крај ќе стигнеме до посакуван резултат. Сакаме со било каква победа да патуваме во Данска. Ако ја оствариме, сметам дека ќе имаме големи шанси и за пласман во плеј-офот“, додава Грнчаров.
Копенхаген осигура пласман во третото коло за ЛШ низ двомеч со Жилина. Данците победија во Словачка со 3:1 и загубија на „Паркен“ со 2:1, па токму гостинскиот триумф на составот на Стале Солбакен е причина за предупредување на Гоце Седлоски до своите фудбалери.
„Од фудбалерите очекувам да го подигнат нивото од дуелите со Малме. Копенхаген има доста квалитетна екипа што секоја сезона е дел од групна фаза во Лига на шампиони или Лига Европа. Знаеме што нè чека, но верувам дека ќе дадеме максимум како што беше случај против Малме“, порача Седлоски без притоа да открие дали и овојпат му ветил на спонзорот Сергеј Самсоненко минување во наредната рунда.
Лига на шампиони/квалификации/3 коло/први мечеви
Денеска играат
Карабаг (Азербејџан) – Шериф Тираспол (Молдавија)
Славија Прага (Чешка) – БАТЕ Борисов (Белорусија)
АЕК (Грција) – ЦСКА Москва (Русија)
ФЦСБ (Романија) – Викторија Плзен (Чешка)
Вардар (Македонија) – Копенхаген (Данска)
Партизан (Србија) – Олимпијакос (Грција)