Хрватските ракометари се разочарани по поразот од Германија на Светското првенство што ги исфрли од борбата за медал, медиумите сумираат впечатоци, прават анализи, коментираат, селекторот „грми“. Лино Червар со „отровни стрели“ кон данските судии Гјединг – Хансен за кои вели дека „вечерва во Келн делеле неправда на бесрамен начин со што ја повредиле и олимписката повелба“.
„Ова беше грабеж на Хрватска што го виде целиот свет. За затвор се овие судии. Ова не е првпат. Данци ни ги одзедоа првенствата во 2008 година, во 2009 година и во 2010 година и тоа треба јавно да се каже. Недозволиво е аматери да судат вакви мечеви и да одлучуваат за нашите судбини“, рече Червар по поразот од „панцерите“.
Хрватска имаше негатива од три гола во 46 минута (15:18) меѓутоа во наредните десет минути направи серија 5:1 и во финишот влезе со водство од 20:19. Понесени од публиката, Германците успеаја да ја вратат предноста и да поведат со 21:20. „Коцкестите“ тргнаа во напад за реми што, според хрватските ракометари и Червар, беше прекинат поради пробивање – Уве Генсхајмер погоди за 22:20 и стави точка на натпреварот.
„Н` одеше, но судиите не дозволија. Ги надигравме Германците пред нивна публика, а н` ја одзедоа победата, ја украдоа од раце. Ова е недозволиво, ова е проблем на ракометниот спорт и тоа треба да прекине. Овие судии треба да бидат елиминирани од судиската организација“, „грмеше“ Червар пред хрватските новинари во Келн.
Хрватска пренесе максимален број на бодови од прелиминарната групна фаза во Минхен и во Келн се пресели како непоразена на турнирот. Но, непланираниот пораз од Бразил на стартот и во второто коло од Германија ги остави Хрватите да бараат утеха во борбата за олимписки квалификации за Игрите во Токио во 2020 година. Пред нив е уште дуел со бранителот на титулата, Франција која заедно со ко-домаќинот на СП е сигурен полуфиналист од групата Е.