Србија ја потврди добрата форма од пријателскиот дуел со Германија и против Португалија во квалификациите за Европското првенство во 2020 година. Фудбалската репрезентација на северниот сосед одигра 1:1 против актуелниот континентален владетел во Лисабон во рамки на групата Б. Стрелец за популарните „орли“ во ремито рамно на победа беше Душан Тадиќ во седмата минута од пенал, израмнувачкиот за Португалците беше дело на Данило Переира во 42. минута.
Покрај двата гола, првото полувреме го одбележа и повредата на Кристијано Роналдо кој во 29. минута побара да биде заменет на разочарување на домашните навивачи на стадионот на Бенфика. Второто полувреме, особено, последните дваесетина минути минаа во знак на португалската селекција. Во 73. минута, Антонио Рукавина играше со рака во сопствениот казнен простор за што полскиот судија Марчињак покажа на белата точка, а по реакција на српските фудбалери и консултацијата со еден од своите асистенци ја поништи одлуката.
Англија со нова „петарда“ во групата А и засега е единствена репрезентација со двоцифрен број на постигнати погодоци по два одиграни меча. По онаа против Чешка на „Вембли“ во петокот (5:0), овојпат ја „испали“ во Подгорица против селекцијата на Црна Гора за конечни 5:1. Црногорците поведоа преку Марко Вешовиќ во 18. минута по што мрежата на Петковиќ ја истресоа Мајкл Кин во 30. минута, Рос Баркли во 39. минута и во 59. минута, Хари Кејн во 71. минута и Рахим Стерлинг во 81. минута.
Убедливи победи и на Франција и на Турција во мечевите од денешната УЕФА програма. „Триколорите“ со 4:0 го декласираа Исланд во групата Х, а Турците со идентичен резултат ја испратија Молдавија од Ескишехир.
Квалификации за Европско првенство во фудбал во 2020 година
Група А
Црна Гора – Англија 1:5
Косово – Бугарија 1:1
Табела: Англија 6 (2 меча), Бугарија 2 (2), Косово 1 (1), Црна Гора 1 (2), Чешка 0 (1).
Група Б
Португалија – Србија 1:1
Луксембург – Украина 1:2
Табела: Украина 4 (2 меча), Луксембург 3 (2), Португалија 2 (2), Србија 1 (1), Литванија 0 (1).
Група Х
Франција – Исланд 4:0
Андора – Албанија 0:3
Турција – Молдавија 4:0
Табела: Франција 6, Турција 6, Албанија 3, Исланд 3, Андора 0, Молдавија 0.