Обединетите нации (ОН) застанаа на страна на фудбалерките. На Фејсбук профилот на организацијата е објавен интересен податок од истражување кој вели дека Лионел Меси има двојно поголема годишна заработувачка од 1.693 девојки во копачки заедно. Затоа и поведоа кампања чија цел е подигнување на свеста и зголемување на платите на фудбалерките за кои сметаат дека заслужуваат.
Аргентинецот во тек на 12 месеци приходува 84 милиони евра од плати, бонуси и маркетинг наспроти 42,6 милиони евра на 1.693 фудбалерки во најсилните седум лиги во светот.
Споредбата излезе на површина во време на женското Светско првенство што се одржува во Франција на кое фудбалерките дигнаа глас и побараа поголеми бонуси за настапи. Најдалеку отидоа американските репрезентативки кои поднесоа тужба против Фудбалската федерација на САД за полова дискриминација со забелешки дека нивните машки колеги се фаворизирани во делот на подготовки, на медицински персонал и на патувања.
Федерацијата се обиде да се оправда дека од фудбалерите има поголем профит, но податоците од 2018 година покажуваат дека фудбалерките заработиле 51 милион долари, еден повеќе од фудбалерите, од кои најголем дел отпаѓаат на влезници.