Успешна ЕХФ недела е зад македонската ракометна репрезентација на резултатски план. На играчки се демонстрираа осцилации, па добрите моменти ќе треба да се негуваат, а лошите да се корегираат до првите денови од новата година за кои е планирано заминување во Словенија на завршни подготовките пред Европското првенство чии кодомаќини ќе бидат Австрија, Норвешка и Шведска.
Во Ескишехир беше совладана Турција со 26:23 и се ремизира со Италија (25:25) додека Грузијците двапати беа поразени во Скопје. Вчера попладне со 25:21, а денеска со 29:28 за успешно заокружување на октомвриските тестови за воигрување и конкурентност во националниот тим.
Селекторот Данило Брестовац имаше на располагање „шарен“ состав за четирите одиграни натпревари. Против Турците и Италијанците настапи без најискусните кои се ставија на располагање за пријателските во СЦ „Борис Трајковски“. Младите, пак, сериозно се наметнаа на задоволство на стручниот штаб кој доби поширока слика за потенцијалот на нешто повеќе од два месеца до континенталниот турнир и настапите во групата во Виена.