Новак Ѓоковиќ со осмата победа над Раониќ во кариерата си обезбеди полуфинале на Мастерсот во Лондон. Како пресудна во, резултатски, тесниот меч, ја издвои менталната сила што ја добил по освојување на тај-брејкот во првиот сет иако признава дека резултатот можел да биде и поинаков.
„Кога би морал да истакнам една работа што го одлучи мечот, тогаш би рекол дека тоа е менталната сила што ми помогна да останам во игра во најважните моменти. Тоа е онаа кога ги играте најважните удари бидејќи влогот во тие поени е голем. Добро го одиграв првиот сет, добро го почнав и вториот, но и Милош возврати. Разликата меѓу нас овојпат беше неколку поени. Ова можеше да заврши и поинаку“, рече Ѓоковиќ по вториот триумф во Лондон.
Раониќ направи 27 нефорсирани грешки, но направи и доста проблеми за Ѓоковиќ. Важи за одличен сервер меѓутоа Србинот не се согласува само со тоа.
„Физички е многу силен. Го користи сервисот како големо оружје, но има и силни удари, посебно во форхенд страната, а знае опасно да нападне и од бекхенд. Беше агресивен во секој удар и навистина ме натера да трчам многу“, дополни Ѓоковиќ.