Франција ја забележа најубедливата победа на женското Европско ракометно првенство што започна денеска во Шведска. Французинките ја совладаа Полска со 31:22 (15:9) во рамки на групата Б во Кристијанстад. Две актуелни и две поранешни вардарки настапија за победничката екипа, Амандин Лејно одбрани седум удари, Александра Лакрабер учествуваше со три гола во успешниот вовед на сребрената селекција од Игрите во Рио де Жанеиро. Екс „црвено-црните“ ракометарки Сираба Дембеле и Алисон Пино завршија со пет, односно, две реализации. Најефикасна Полјачка беше Кинга Грзиб со шест погодоци.
Вториот меч во групата Б, пак, го донесе и првото изненадување на турнирот. Германија ја победи Холандија со 30:27 (13:14). Свења Хубер ги предводеше Германките со 7 гола, Корнелија Грот и Лоис Абинг реализираа по пет за Холанѓанките.
Србија триумфира над Словенија со 36:34 (17:16) во балканското дерби во групата А во Стокхолм. И во овој меч настапија две вардарови ракометарки, двете за поразениот тим. Тамара Мавсар беше најефикасна на натпреварот со 9 гола, Барбара Лазович постигна 3. Прв стрелец во селецијата на северниот сосед беше Сања Радосављевиќ со осум погодоци. Шведска, пак, ја совлада Шпанија со 25:19.
ЕП 2016 Шведска
Резултати, 1. коло
Група А: Србија – Словенија 36:34, Шведска – Шпанија 25:19
Група Б: Франција – Полска 31:22, Холандија – Германија 27:30
Утре на ЕП
Група Ц: Унгарија – Чешка (18.30 ч.), Данска – Црна Гора (20.45 ч.)
Група Д: Русија – Хрватска (18.30 ч.), Норвешка – Романија (20.45 ч.)