За излез од оваа политичка криза, мислам дека ни треба поширока дебата, рече вечерва во интервју за тетовската телевизија „Арт“ лидерот на ДУИ, Али Ахмети.
Тој вели дека дебатата пред се, треба да биде меѓу ВМРО-ДПМНЕ и СДСМ.
„ВМРО-ДПМНЕ и СДСМ треба да разговараат меѓу себе. Се работи за доброто на земјата. Сметам дека за доброто на земјата треба да се воспостават линии за комуникации меѓу овие две партии“, рече Ахмети.
Коментирајќи го денешното соопштение на министерството за надворешни работи на Русија, Ахмети рече дека случајот е ист како со српскиот воз во Косово кој е подготвен во Москва.
„Евроатланстскиот пат е единствениот пат добар за Македонија. Но и Европа треба да ни помогне. Ние нема да донесеме финална одлука без да се консултираме со меѓународната заедница. И уште нешто. Сите треба да знаат дека ДУИ ќе донесе правилна одлука“, рече лидерот на ДУИ.
Во однос на средбата на лидерите на албанските политички партии со премиерот на Албанија, Еди Рама, вели дека на средбите не правеле нов Устав, туку некои прашања кои ќе придонесат за стабилноста на државата и за доброто на Албанците.
Претходно во интервјуто, Ахмети рече дека ВМРО-ДПМНЕ и ДУИ не се согласиле за правење влада бидејќи партијата на Груевски не сакала да го прифати условот за продолжување на работата на СЈО.
„Главниот проблем се јави бидејќи ние поставивме некои услови. Ние се залагаме сите партии да го прифатат СЈО, а ВМРО-ДПМНЕ тоа не го направи. Не можевме да брзаме со одлуката само затоа што некому му се брзаше. Не можевме да преземене незамислени чекори, се работи за иднината на земјата. Реков во некои медиуми дека Албанците нема да бидат разочарани. Имавме отворена внатрепартиска дебата и не можевме да отстапиме од петте барања кои ги имавме“, рече Ахмети одговарајќи на прашањето зошто пропаднаа преговорите со ВМРО-ДПМНЕ
Лидерот на ДУИ рече дека во неговата партија нема фракции и дека потпретседателите не отишле во СДСМ на своја рака.
„Ние не бегавме од ваквите средби. Јас знаев дека тие се отидени таму. Информациите дека во ДУИ има спротиставени ставови околу тоа со кого да коалицираме не се точни“, рече Ахмети.