За Нова ТВ од Букурешт: Сашко Ѓ. Димовски
Нема простор за разочарување, главата горе и одиме натаму, е пораката што селекторот Игор Ангеловски ја испрати и до играчите и до јавноста по поразот на Македонија од Австрија (1:3) во првиот меч во рамки на групата Ц на 16. Европско фудбалско првенство. Како клучна за конечниот исход ја наведе неискористената шанса на Боби Николов при 1:1, по што следуваше казна на спротивната страна.
– Имавме моменти на пад на концентрација, но имавме и позитивни сегменти. Сепак, играме на големо натпреварување во кое нема слаби тимови, па нормално е противниците да го користат тоа. Шансата што не ја искористивме преку Николов при 1:1 мислам дека беше клучна за крајниот епилог. Меѓутоа, нема простор за разочарување. Главите горе, продолжуваме натаму, пред нас има уште два натпревара. Им благодарам на навивачите за амбиентот што го создадоа и истовремено жалам што не возративме со позитивен резултат, истакна Ангеловски.
В четврток од 15 часот, македонската репрезентација ќе игра против Украина со надеж за поповолен резултат од денешниот во Букурешт.