Мнозинството Грци (53 отсто) сметаат дека земјата оди во погрешна насока, а речиси четворица од десет, односно 39 проценти велат дека се движи во правилна насока. Пандемијата и натаму е главен проблем за Грците, а веднаш потоа следи економијата и поскапувањето, покажуваат резултатите од истражувањето на јавното мислење спроведено од агенцијата „Metron Analysis“ за телевизијата „Мега“, јави дописничката на МИА од Атина.
Во однос на пандемијата, шест од десет анкетирани рекле дека најлошото минало, а 30 отсто сметаат дека најлошото следува. Од анкетираните, 82 проценти се вакцинирани, 21 отсто прележале ковид-19, а 19 проценти од нив се веќе вакцинирани. Вакцините се безбедни за 65 проценти од испитаниците, наспроти двајца од десет кои сметаат дека се небезбедни.
На политичката сцена, Нова демократија и натаму е прва политичка сила во земјата, пред СИРИЗА на второто место и Движењето на промена на третото, која има зголемен рејтинг по изборот на новиот лидер.
Истражувањето на јавното мислење од агенцијата „Metron Analysis“ за телевизијата „Мега“ било спроведено од 12 до 18 јануари во 2022 година со анкетирани 1.306 граѓани.