На посебни јавни седници во Апeлацискиот суд, одбраната на Миле Јанакиески и Кирил Божиновски денеска ќе образложaт жалбите со кои бараат укинување на притворот.
Тие беа притворени на 14 ноември, на барање на Специјалното јавно обвинителство, кое се сомнева дека планирале бегство. СЈО се повикува на службена белешка од УБК според којаЈанакиески преку посредник барал амнестија до претседателот Иванов. .
Одбраната смета дека тие се ставени во притвор без да се овозможи да се произнесат пред судот и тврди дека не се запознаени со докaзот. Од одбраната тврдат дека не постоел никаков посредник, ниту се барало амнестија од Иванов, како што е наведно во белешката.
Од Кабинетот на Иванов пак, негираат дека имало посредник и тврдат дека Претседателот Иванов имал средба со Миле Јанакиески, дента кога Груевски објави на Фејсбук дека е во Будимпешта, потврдија од Кабинетот на шефот на државата, но наведуваат дека на средбата не се разговарало за амнестија.
Од ВМРО -ДПМНЕ обвинуваат дека притворот е базиран на фингирана службена белешка, класифицирана како строго доверлива. Ден пред седниците на Апелација, бараат судиите да им дозволат на Јанакиески и Божиновски да се бранат од слобода.
-Како што ВМРО-ДПМНЕ и претходно изјави, раководството на ВМРО ДПМНЕ со господинот Мијалков подолго време нема комуникација и не ги знаеме деталите за неговото приведување. Меѓутоа, од она како што јавноста може да оцени, секој политички монтиран процес не смее да биде оправдан од јавноста и не смеат да се користат институциите за политички цели, изјави портпаролот на партијата Димче Аровски.
Од СДСМ пак сметаат дека ВМРО ДПМНЕ се обидува да влијае врз судството.
-ВМРО-ДПМНЕ како и порано и сега продолжува брутално да се меша или да има обид да се вмешува во правосудството. Нашиот став е конзистентен и е многу јасен и прецизен дека, настрана од политиката ние немаме право да се мешаме во одлуките на правосудните органи, изјави портпаролот на СДСМ Костадин Костадинов.
Откако екс премиерот Груевски избега, по Јанакиески и Божиновски беше приведен и екс директорот на УБК, Сашо Мијалков, кој е трет негов близок човек кој заврши во притвор. Следнава недела се очекува Апелација да закаже седница и за приведувањето на Мијалков, за неговата жалба за притворот.