Актуелниот градоначалник на скопската Општина Аеродром, Златко Марин не е кандидат на СДСМ. Александар Филиповски од СДСМ ќе бара поддршка од аеродромци на локалните избори.
СДСМ не ги кандидира актуелните градоначалници на скопските општини Карпош и Аеродром Стефан Богоев и Златко Марин на престојните локални избори закажани на 17 октомври. Кандидат за градоначалник на Општина Карпош ќе биде Душко Весковски кој е директор на јавното претпријатие „Водовод“ – Скопје, додека Богоев ќе добие владина функција, соопшти генералниот секретар на СДСМ Љупчо Николовски.
– Стефан Богоев ќе биде носител на висока државна, централна позиција, којашто нешто како мотивација е претходно договорено со претседателот на партијата. СДСМ дава најголеми шанси за младите и отвора најшироа дебата. Ги цени младите и им дава шанса да чекорат напред, така што Богоев ќе биде носител на позиција во рамки на институциите на Владата, изјави генералниот секретар на СДСМ, Љупчо Николовски.
На местото на Марин, кандидат за градоначалник на скопската Општина Аеродром е Александар Филиповски. Нови кандидати за градоначалници на СДСМ има и во Прилеп, каде поранешниот министер за транспорт и врски, Горан Сугарески ќе бара доверба на локалните избори, во Велес каде кандидат е д-р Ненад Коциќ. СДСМ свој кандидат има и во Тетово, Хемдие Алезовиќ. Во Кавадарци кандидат е Горан Тодоров, во Сопиште Сашо Стојановски, а во Свети Николе актуелниот градоначалник Сашо Велковски.
Владејачката партија досега објави 51 кандидат за градоначалници, меѓу кои и за Град Скопје, за каде актуелниот градоначалник Петре Шилегов е кандидат за втор мандат.
(Видео): Николовски ги соопшти кандидатите за градоначалници на СДСМ