Македонскиот министер за надворешни работи, Никола Димитров официјално се извини во името на Македонија за случајот со германскиот државјанин со либанско потекло Калед ел-Масри, за незаконското апсење во 2004 година во Скопје, кој беше држен во изолација, а потоа и предаден ЦИА, во рамки на тајната програма на американската агенција за предавање и мачење, која беше усвоена по терористичките напади во САД на 11 септември 2001 година.
Официјално писмо со извинување од македонските власти доаѓа шест години по пресудата на Европскиот суд за човекови права, дека Македонија прекршила неколку одредби од Европската конвенција за човекови права.
Во писмото од 28 март оваа година, Димитров изразува “искрено извинување и безрезервно жалење” за она што го опиша како “несоодветно однесување на нашите власти”, соопшти Фондацијата отворено општество во вторникот.
Димитров истакнува дека како резултат на тоа Ел Масри минал низ “неизмерни и болни искуства и претрпел сериозни физички и психички тортури“.
Ел-Масри тврдеше дека бил заробен во Македонија како дел од програмата на ЦИА и бил жртва на “невообичаено испорачување” на ЦИА. Тој ја посочи Македонија како одговорна за ова тешко искушение.
Тој тврди дека е неправедно уапсен во Македонија на 31 декември 2003 година, бил држен во изолација поради сомнеж за наводна поврзаност со терористички организации и бил малтретиран околу 23 дена. Потоа бил предаден на агенти на ЦИА, кои го одвеле во таен притворски комплекс во Авганистан, каде што останал до мај 2004 година.
Во 2009 година, Иницијативата за правда на Отворено општество започна процес пред Европскиот суд за човекови права во име на Ел Масри, со тврдење дека македонската полиција кон него се однесувала нечовечки и понижувачки, дека му била загрозена слободата на изразување, како и тоа дека му било загрозено правото на семеен живот и правото на правично судење.
Судот во 2012 година утврди дека Македонија прекршила неколку одредби од Европската конвенција за човекови права и одреди државата да му исплати оштета од 60.000 евра.
-Го поздравуваме извинувањето од владата до Ел-Масри и признавањето дека нејзините безбедносни служби ја прекршиле Европската конвенција за човекови права. Ова, секако, е напредок во однос на ставот што го имаат САД, кои продолжуваат да одбиваат да утврдат одговорност кај ЦИА, чии службеници се одговорни за овој ужасен случај или евентуално да признаат грешка во случајот со Ел-Масри, а камо ли да обезбедат оштета, изјави во вторникот, директорот на Иницијативата, Џејмс Голдстон.
Сепак, тој рече дека ова е само првиот чекор, и дека очекува Македонија допрва да отвори темелна истрага и да ги утврди одговорните за случајот.