Европската Комисија реагира на последните информации дека дополнителни 87 милиони корисници на Фејсбук, од кои околу еден милион во Европа, се погодени од скандалот со Кембриџ Аналитика.
Еврокомесарката за правда, Вера Јурова, пред една недела испрати писмо до Фејсбук, барајќи разјаснувања околу аферата со Кембриџ Аналитика во која милиони лични податоци на корисници на социјалната мрежа биле најверојатно нелегално искористени.
Портпаролот на комесарката во Брисел денеска повтори дека оваа „злоупотреба е неприфатлива“ и дека „последните бројки потвдуваат дека европските корисници биле погодени“, јави МИА од Брисел.
Фејсбук има рок од две недели по испраќањето на писмото да одговори на барањата на Европската Комисија.
Потпаролот денеска потврди дека Фејсбук „покажале волја“ да соработуваат и дека двете страни ја разгледуваат можноста за контакти на „високо ниво“.
Основачот на Фејсбук, Марк Цукенберг, вчера преку статус соопшти дека социјалната мрежа во иднина повеќе ќе инвестира во безбедноста на корисниците и сузбивање на лажните вести, при што објави дека во таа насока ќе избришат преку 270 страници и акаунти оперирани од руска организација наречена ИРА.
-Повеќето од нашите акции против ИРА досега беа за да ги спречат од мешање во странски избори. Оваа новост е за да се избришат нивните страници кои таргетираат луѓе кои живеат во Русија. Оваа руска организација постојано се обидува да ги манипулира луѓето во САД, Европа и Русија, и ние не ги сакаме на Фејсбук било каде во светот, вели тој.
Претходно од оваа компанија соопштија дека оваа недела „Фејсбук“ ќе направи измени кои ќе овозможат дополнителни начини во борбата против лажните вести. Една од опциите е и дека ќе овозможат идентификација на пријателите што споделуваат лажни вести.
Измените првпат се тестирани минатата година, а им дозволуваат на корисниците да го откријат изворот на веста, поврзаните статии и мапата на споделување на веста која содржи информации за физичката локација на местото на најчесто споделување и кои корисници, односно пријатели го прават тоа.
Кога корисниците имаат увид во деталите за темата што се обработува во статијата, може да се дојде до информации кои ја разоткриваат потенцијалната лажна вест. Од друга страна, споделувањето на веста ја открива нејзината популарност и популарноста кај вашите пријатели.
Како слабост се смета тоа што со опцијата нема да може да се детектира потенцијалниот сарказам или критика.