Премиерот Зоран Заев изрази изненадување од ставот на претседателот на државата Стево Пендаровски што го изнесе вчера во Приштина во врска со иницијативата „Отворен Балкан“.

Неразбирливо е зошто некој би бил против пријателство со соседите, против зближување на младите и народите од Западен Балкан и против полесна и побрза економска размена меѓу земјите од регионот, изјави Заев за ТВ21 и додаде дека минатото покажало што значи затворен Балкан и оти е неоправдано кое било заговарање против „Отворен Балкан“.

Според Заев, особено е неразбирливо кога „ваква негативна реакција доаѓа од првиот човек во државата кој би требало да биде прв и во заштита на интересите на граѓаните“.

Во Северна Македонија претседателот на државата нема никакви ингеренции во делот на олеснување на царинските процедури, во делот на воведувањето „One Stop Shop“ премини за брз проток на границите, во делот на признавање на работни дозволи и дипломи, изјави Заев.

Тој нагласи дека не е загрижен, туку е уверен оти институциите посветено ќе работат на обезбедување на бенефитите од оваа иницијатива за граѓаните.

Изненаден сум што Пендаровски ги промени своите ставови за оваа, пред сѐ, економска иницијатива, но нема да бидам изненаден кога повторно ќе се премисли за да даде поддршка во периодот што доаѓа, а во интерес на граѓаните, на државата и на регионот, истакна Заев.

Претседателот Пендаровски вчера, за време на посетата на Косово, на заедничката прес-конференција со косовската претседателка Вјоса Османи, рече дека „Отворен Балкан“ е фалична иницијатива од самиот почеток, бидејќи наместо да учествуваат сите шест држави од Западен Балкан, во неа се пола. Тој напомена дека сè додека иницијатива не ги опфати сите шест држави на Западен Балкан нема да биде успешна.

„Отворен Балкан“, според него, треба да биде само еден аспект од Берлинскиот процес кој има институции и ресурси, а оваа иницијатива засега го нема тоа.

Добронамерни иницијативи, се разбира, може да бидат само дел, не може да бидат супституција на Берлинскиот процес кој продуцираше одлични резултати досега и кој трае веќе седум-осум години со тенденции да се проширува и обогатува со нови содржини, рече Пендаровски.  

Тој потсети дека на почетокот, во 2019 година, изразил резерви за „Отворен Балкан“, бидејќи сметал дека ќе бил против ако е обид за реставрација на некаква Југославија или за алтернатива за членство во ЕУ, но подоцна ја поддржал иницијативата, откако добил уверување од премиерите на земјите што се дел од проектот дека нивните идеи не се такви.