Кипарската Влада упати препорака до сите граѓани да се тестираат со селф тест, доколку се целосно вакцинирани или со рапид тест за невакцинираните, пред домашните собири за претстојните божикни и новогодишни празници, јави дописничката на МИА од Атина.
За домашните празнични собири е дозволено е да има најмногу 20 лица, вклучувајќи ги и домаќините и децата.
Од денеска, сите вработени кои се вакцинирани или прележале ковид-19, за пристигнување на работните места задолжително ќе треба да имаат негативен резултат од ПЦР или рапид тест, што ќе важи седум дена, а исклучок се оние кои примиле трета доза.
Училиштата ќе се отворат на 10 јануари и за сите, за учениците, наставниците, професорите и останатиот персонал, на првиот училиштен ден од второто полугодие ќе биде задолжителен негативен резултат од ПЦР или рапид тест.
Од крајот на јануари се намалува важноста на потврдата за прележан ковид-19 од шест на три месеци.