Германската канцеларка Ангела Меркел апелира на единство во Европа, откако најпрво на ЕУ и се слуќи Брегзит, а сега и доминација на Доналд Трамп на европско тло за време на Г7 самитот.

– Ерата кога можевме комплетно да се потпреме на други е завршена. Ова го заклучив изминативе неколку дена. Ние како Европа мораме да ја земеме иднината во свои раце, во пријателство со САД, со Велика Британија и како добри соседи со сите други како Русија и останатите, порача Меркел пред сестринските партии на нејзината партија.

Според германската канцеларка, Европјеците треба да се борат за својата иднина и судбина.

За време на Г7 самитот во Сицилија, како и состаноците во НАТО во Брисел неодамна, европските лидери на моменти имаа помалку чудна интеракција со американскиот претседател Доналд Трамп, што можеше да се забележи од видеата кои ги пласираа медиумите.

Трамп дојде и го впери прстот во одредени членки на НАТО, алудирајќи дека тие не плаќаат онолку средства колку што треба во Алијансата, а во меѓувреме успеа да на ја навреди Германија со зборовите дека таа е “многу лоша“.

Бидејќи ова стана предмет на многу прашања за ставовите на Трамп кон најмоќната членка на ЕУ, во јавноста се јави Гери Коен, шеф на Националниот совет за економија, кој рече дека Трамп мислел на трговијата на Германија а не “лоша земја“ како целина.

Уште една работа која ги загрижува Европејците е што Трамп им порача дека можно е по враќањето во САД да излезе од договорот за климатските промени потпишан од претседателот Барак Обама во 2015.

Канада, Франција, Германија, Италија, Јапонија и Велика Британија би останале без САД во тој договор, ако се знае дека Трамп во предизборната кампања, како и повеќето членови во неговата администрација сметаат дека проблемот со климатските промени не е реален и дека Америак трошела пари за џабе на таа програма.