Во главниот град на САД денеска се очекува да пристигнат илјадници луѓе на протестен марш наречен „Порази ги мерките“, а во врска со наредбата за доказ за вакцинација при влез во јавните места.
Протестот беше најавен во време кога округот Колумбија минатата недела ги изгласа овие мерки според кои се бара доказ за вакцинација при влез во ресторани и други локални бизниси.
Жителите на Вашингтон се загрижени дека маршот може да предизивика судир меѓу демонстранти дојдени од други градови и локалните жители.
Во случај на судир, протестот може да ги врати немилите сцени во Вашингтон од 6 јануари лани кога поддржувачи на поранешниот претседател Доналд Трамп насилно упаднаа во американскиот Капитол.
Роберт Ф. Кенеди, активист против ковид-19 вакцинација и еден од организоторите на маршот, изјави дека очекува мирен протест.
Американците сакаат демократијата да им биде вратена и овој протест е нивно барање за тоа, изјави тој.
Кенеди е блокиран на Инстаграм и се смета за еден од „дванаесетмината на дезинформацијата“, како што се наречени од медиумите, а поради лажните тврдења за вакцините и ширење на теории на заговор за Ентони Фаучи, главниот советник во Белата куќа за борба со пандемијата.
Од групата што го промовира протестот на Фејсбук истакнаа дека ќе ги бојкотираат хотелите и рестораните во Вашингтон и дека ќе се сместат во хотели во Вирџинија каде што не се бара доказ за вакцинација.