Ноќеска, на 25 ноември 2024 година, околу 3:30 часот по полноќ, непознато лице насилно влегло во Адвокатската комора на Република Северна Македонија и предизвикало пожар. Пожарот билбрзо изгаснат од противпожарните екипи. Меѓутоа, предизвикана е значителна материјална штета, нема човечки жртви.
„Нападот врз Адвокатската комора не е само напад врз еден правен субјект, туку е напад врз целокупната адвокатура и правниот систем во Република Северна Македонија“, реагираат од Комората.
Тие нагласуваат дека овој чин на насилство и вандализам е сериозна закана за јавната безбедност и правниот поредок во земјата, и не може да се оправда под никакви околности.
„Ваквиот напад не смее да остане неказнет, а одговорните мора да се соочат со последиците од своите дејствија и да бидат најстрого казнети“, апелираат преку соопштение од Адвокатската комора.
Тие ги повикаа надлежните органи да дејствуваат брзо и ефективно за да се идентификуваат и приведат одговорните за овој напад.