За Нова ТВ од Букурешт: Сашко Ѓ. Димовски

Без малку тридеценискиот сон на јавноста во Македонија се претвори во јаве во ноември во минатата година, сон што денеска и официјално ќе почне да се живее во реалноста. Фудбалската репрезентација попладнево (18 ч.) во меч против Австрија на Националната арена во Букурешт  ќе дебитира на Европските првенства, подвиг што беше реализиран преку Дивизија Д од Лигата на нации, најмладото репрезентативно натпреварување на УЕФА.

Дебито на континенталните турнири за селекторот Игор Ангеловски, како што и самиот порача од романската престолнина, е бајка што ќе ја памети цел живот, ќе ја паметат и фудбалерите, навивачите кои ќе пулсираат со „црвено-жолтите“ херои преку малите екрани, но и оние среќници кои стигнаа до билет во живо да уживаат и бидат сведоци на 90-те минути за анали на македонскиот фудбал.

Мачката Кес типува на Македонија

Мачката Кес, која ќе биде „консултирана“ за прогноза на исходот на мечевите на 16 фудбалски евросамит, се истакна уште во првото предвидување за македонската репрезентација. За победник во мечот со Австрија ги одбра македонските фудбалери, па ако филингот не ја излаже, тогаш првата рунда на ЕП ќе мине во знакот на дебитантите по вчерашната победа на Финска над Данска со 1:0.

Небото над Букурешт „се отвори“ на нецели четири часа до натпреварот со групата Ц што македонските симпатизери го чекаат со нетрпение. Дел од нив го толкуваат како позитивен сигнал, како предвесник на радост и „лепат“ на народната дека Господ плаче од среќа за самото присуство на македонските репрезентативци на ЕП 2020, но и како најава за „грмење“ од песна на трибините и надвор од нив околу 20 часот.

Ангеловски со ист состав како против Словенија, со Пандев и Трајковски во напад

Селекторот Ангеловски, се чини, нема да експериментира со составот и против Австрија на терен ќе ги испрати единаесетте што почнаа во пријателскиот меч со Словенија во формација 3-5-2. Тоа, секако, значи со Пандев во нападот кому друштво ќе прави Александар Трајковски, со Аријан Адеми, Енис Барди и Елиф Елмас во средината што ќе биде засилена со Езџан Алиоски и Боби Николов по страничните позиции, со Висар Муслиу, Кире Ристевски и Стефан Ристовски во одбраната и Столе Димитриевски на голот. Останатите ќе чекаат шанса од клупата, за евентуалони корекции ако нештата тргнат во непосакуван правец или за „бетонирање“ на позитивниот вовед во шампионат што е надеж на секој еден во „црвено-жолто“ овде во Букурешт.

Првото коло во групата Ц ќе биде комплетирано вечерва во Амстердам со мечот меѓу Холандија и Украина, а во увертира на третиот натпреварувачки ден на ЕП ќе играат Англија и Хрватска.