Мандатарот Зоран Заев ноќеска до Собранието ја достави Предлог-програмата и Предлог-составот на новата Влада. Претседателот на Собранието Талат Џафери за утре во 11 часот, ја закажа сеницата за избор на новата Влада, која ќе биде избрана најдоцна до среда на полноќ.
Претходно, на прес конфренција лидерот на СДСМ Заев го состави неговиот избор на министри кои би ја сочинувале реформската влада, откако неговите предлози ги одобри Централниот одбор на партијата. На овој список се наоѓаат:
Радмила Шеќеринска – министер за одбраната
Оливер Спасовски – министер за внатрешни работи
Драган Тевдовски – министер за финансии
Никола Димитров – министер за надворешни
Рената Десковска – министер за образование
Љупчо Николовски – министер за земјоделство
Мила Царовска – министер труд и социјала
Роберт Алаѓозовски – министер за култура
Дамјан Манчевски – министер за информатичко општество и администрација
Горан Сугарески – министер за транспорт и врски
Министри без ресор –Кочо Анѓушев, Едмонд Адеми, Роберт Поповски, Самка Ибраимовски,Аднан Ќахил,Зорица Апостоловска и Зоран Шапуриќ.
Вчера, предлозите за свои претставници во извршната власта ги соопшти и ДУИ:
Хазби Лика – вицепремиер за политички систем и односи меѓу заедниците
Бујар Османи – вицепремиер задолжен за евроинтеграции,
Садула Дураку – министер за животна средина и просторно планирање
Рамиз Мерко – министер без ресор,
Крешник Бектеши – министер за економија
Билен Салији – министер за правда.
Во новата Влада учествува и Алијанса на Албанците со две министерски места:
Арбен Таравари (од ДР ДПА) – министер за здравство и
Сухејл Фазлиу (од НДП) – министер за локална самоуправа.
До изјаснувањето на пратениците за составот и програмата на новата Влада има уште еден ден. Во тој рок, како што најави мандатарот Заев ќе прати писмо до СЈО за проверка дали некој од кандидатите се под истрага, бидејќи, ова според него е единствената независна институција.
Пред соопштувањето на составот на новата Влада, претходеа целодневни разговори и консултации на мандатарот со коалициските партнери. Додека со ДУИ и Алијансата уште претходните денови беше јасно дека е постигнат договор, последни, дали ќе бидат дел од новата Влада се изјаснија од БЕСА – дека таа нема да биде дел од идната влада, бидејќи, како што соопштија „мандатарот за формирање влада не беше подготвен за ги прифати принципите на заедничкото владеење со Движењето БЕСА и околу истите да потпише заеднички договор“, стои во официјалното соопштение од Движењето БЕСА.
– Без оглед на тоа што БЕСА останува опозициска партија, таа ќе ја поддржи секоја иницијатива што ќе биде во полза на Албанците и државата, а во насока на имплементација на потребните реформи и нашите врати ќе бидат секогаш отворени за секој кој тежнее кон тие принципи. Денес со право и БЕСА може да се гордее дека беше дел од процесот за уривање на режимот Груевски-Ахмети, но нашата задача уште не е довршена, се вели во соопштението од БЕСА.
Заев на синоќешната прес конференција рече дека БЕСА сепак ќе ја поддржува новата рефорска влада.
-Навистина за одредени мали работи ние не можевме да се договориме од проста причина што едноставно не беше прифатливо за нас. Можеби како одминува времето ќе бидат отворени околности за да се надминат ваквите прашања коишто не поставија во ваква позиција, но всушност нивниот позитивен став кон она што се случува во Македонија предводена од опозицијата, новата реформска Влада ја прифатија како позитивно нешто и тоа ни дава за право да веруваме дека во иднина ќе имаме соработка за реформскиот процес, рече мандатарот и го повика и останатите партии – ДПА и ВМРО ДПМНЕ и коалицијата да ја поддржат, најавувајќи инклузивен процес во интерес на граѓаните.
Одговарајќи на новинарско прашање, дали Влада која зад себа има поддршка од 62 пратеници може да биде стабилна, Заев рече дека е убеден во нејзиниот капацитет, додавајќи дека „траењето на Владата зависи од чесноста, од отвореноста, транспарентноста, од отчетноста пред граѓаните и од успешноста на политиките“.
Според Деловникот на Собранието, расправата за програмата на мандатарот и предлогот за состав на Владата трае најмногу два дена и се гласа на полноќ, во случајов в среда на полноќ, а за неа треба да гласаат најмалку 61 пратеник во 120-членото Собрание.