ОБСЕ/ОДИХР го објави финалниот извештај за изборите спроведени на 11.декември во Македонија, а во него се вели дека, потребни се неколку измени за стабилен изборен процес.
– Иако партиите генерално, имаа можност за слободно претставување на кампањите, се препорачува властите и политичките партии да преземат конкретни чекори за да не се врши притисок врз вработените од јавната администрација, политичките активисти и другите кои ги посетуваат таквите настани или пак самото гласање. Наводите за притисок треба темелно да бидат истражени, порачува ОБСЕ/ОДИХР.
За Државната изборна комисија, во извештајот се препорачува сите сесии да се одржуваат јавно и транспарентно а поплаките од партиите да се разгледуваат без партиски ставови.
Во извештајот исто така е забележано дека партијата ВМРО-ДПМНЕ покрај своите проекти, водела кампања и со негативна реторика.
– Коалицијата предводена од ВМРО-ДПМНЕ употребуваше националистични пораки и ја обвинуваше коалицијата предводена од СДСМ дека сака да го ослаби националниот идентитет, тврдејќи дека изборите се еден вид референдум за унитарноста на државата. СДСМ ја обвини ВМРО-ДПМНЕ за злоупотреба на власта и за криминални дејствија, се вели во извештајот.
Во однос на кампањите меѓу албанските партии, во извештајот се наведува дека на социјалните медиуми се објавувале нови прислушувани разговори од претставници на ДУИ, но дека сите тие се обраќале само кон својата етничка заедница.
ОБСЕ/ОДИХР забележува дека речиси ниту една дебата помеѓу политичките лидери не се случила.
Во финалниот извештај на набљудувачите на ОБСЕ/ОДИХР исто така е наведен и постизборниот процес, а во кој најтензично беше пред канцелариите на Државната изборна комисија.
– Постизборниот процес помина во тензична атмосфера и остра реторика главно од ВМРО-ДПМНЕ. Откако Беса и СДСМ доставија жалби за резултатите од неколку избирачки места, ВМРО-ДПМНЕ повика на протести пред ДИК. На 17 декември лидерот на ВМРО-ДПМНЕ достави Проглас во кој ги обвини ДИК и странските амбасадори за вмешаност во изборите. Следниот ден беа објавени посмртници на сегашниот и поранешниот претставник на дипломатската заедница во Скопје. ОБСЕ/ОДИХР се уште не забележал да се покренати истраги за овие работи, се вели во извештајот за изборите во Македонија одржани на 11.декември 2016 година.