Фудбалот како алатка за ресоцијализација по издржување на затворска казна. Најважната споредна работа во светот познава бројни примери на играчи кои се вратија во копачки по минат период зад решетки. Меѓу нив (според некои информации ги има преку 120) и звучни имиња од кои дел и со статус на репрезентативци на своите земји. Ова се само некои од фудбалерите кои се соочија со законот по сторени тешки кривични дела.
Бруно Фернандез де Соуза – осуден за убиство
Поранешниот голмански репрезентативец на Бразил доби затворска казна од 22 години. Беше осуден за сурово убиство на девојка (мајка на неговото дете) чие тело потоа го распарчил и ги хранел своите кучиња. Зад решетки мина седум години (2010-2017) и по поднесената жалба беше пуштен во февруари лани. Но, бразилскиот суд нареди повторно негово апсење во април.
Во двата месеца на слобода потпиша двегодишен договор со бразилскиот второлигаш Боа Еспорте и покрај жестоките простести и негодувања на навивачите. Како резултат на тоа, три спонзори (CardioCenter, Nutrends Nutrition, Magsul) ја прекинаа соработката со клубот од сојузната држава Минас.
Мајкл Кинсела – осуден за криумчарење и растурање дрога
Поранешниот член на „црвените“ од „Енфилд роуд“ заглави девет години во затвор за криумчарење на дрога. Беше член на група од подземјето во градот на Битлси која растураше кокаин, хероин и екстази низ улиците на Ливерпул, на Амстердам и во Шпанија. Од незаконските активности заработи 1,6 милиони фунти, а по завршување на затворската казна се врати во фудбалот.
Адам Џонсон – осуден за педофилија
Екс-репрезентативецот на Англија е осуден на шест години зад решетки, казна што ја доби за педофилија. Адам Џонсон како фудбалер на Сандерленд заработуваше 60,000 фунти неделно, настапуваше во една од најсилните светски лиги, имаше слава и се што ќе посака. Но, полов однос со 15 годишно девојче го плати скапо. Неофицијални извори од Англија најавуваат дека Џонсон би можел да се најде на слобода во текот на 2018 година и да се врати на фудбалската игра. Пред Сандерленд играше и за Манчестер сити, за Вотфорд, за Лидс јунајтед и за Мидлсборо. За „Гордиот Албион“ одигра 12 натпревари и постигна два гола.
Марлон Кинг – осуден за силување
Фудбалерот од јужен Лондон доби отказ во Виган во 2009 година, откако беше осуден за сексуално вознемирување. Беше казнет со 18 месеци затвор за силување и нанесување на тешки телесни повреди. По одлежување на казната се врати на фудбалската игра пришто смени три екипи – Ковентри, Бирмингам и Шефилд јунајтед. Пред проблемите со законот ги носеше дресовите и на Нотингам форест, на Вотфорд, на Гилингам, на Барнет, на Лидс јунајтед, на Хал и на Мидлсборо. Беше репрезентативец на Јамајка за која настапи во 24 меча во кои реализира 12 гола од 2004 година до 2013 година.
Рене Игита – осуден за киднапирање
Славниот чувар на мрежата на Колумбија падна во раце на полицијата за учество во киднапирање. Беше посредник меѓу тогашниот крал на дрогата Пабло Ескобар и Карлос Молина. Игита ги земал парите за откуп на ќерката на Молина и ги предал на киднаперите. За услугата наплатил 64,000 долари. Доби затворска казна во траење од седум месеци по што се врати меѓу стативите. За колумбиската селекција настапи во 68 натпревари и постигна три гола. Моментно работи како тренер на голманите во Атлетико Национал, клуб од неговиот роден Меделин.