Основното јавно обвинителство Скопје повело постапка против 20-годишник кој вчера се обидел да запали албанско знаме.
Јавното обвинителството на Република Северна Македонија информира дека постои основано сомнение дека тој сторил кривично дело – Предизвикување омраза, раздор или нетрпеливост врз национална, расна, верска и друга дискриминаторска основа од член 319 став 1 од Кривичниот законик.
-Осомничениот на 2 декември 2024 година, во вечерните часови, се обидел да запали албанско национално знаме, при што бил забележан и спречен од полициски службеници кои го привеле. Надлежниот јавен обвинител до судијата на претходна постапка од Основниот кривичен суд Скопје достави предлог за определување мерка притвор, соопшти државното Обвинителството.
Случајот е евидентиран и во дневниот билтен на Министерството за внатрешни работи кое информира дека вчера во 23.10 часот на подрачјето на Центар во Скопје, полициски службеници од Полициската станица Центар го лишиле од слобода К.К.(20) од Скопје.
-Тој бил затекнат при обид со запалка да запали знаме. Знамето и запалката биле одземени, а тој бил задржан во полициска станица. По целосно документирање на случајот, против него ќе биде поднесена соодветна пријава, соопшти МВР.