Албанскиот премиер Еди Рама не е оптимист за позитивни вести од Советот на Европа каде во текот на неделата ќе се дискутира за датумот за отпочнување на преговори на Албанија и Северна Македонија за членство во Европската унија.
„Дали сум оптимист? – Не“, отсечно одговорил Рама за ирскиот весник „Ајриш Тајмс“, пренесува тиранската телевизија „Топ чанел“.
Тој додал дека не може да се биде оптимист ако се види се она што се случува во Европа.
„Јас сум оптимист за иднината на Албанија, но не и за она што ќе се случува идната недела . Ние сме колатерална штета. Кога некаде има бомби и се погодува една градина, ние сме градината“, рекол Рама.
Тој се задржал и на правосудната реформа и критиките за нефункцинирање на судските институции.
„Ние исчистивме толку многу со процесот на ветинг, а практично Уставниот суд не функционира. И сега тие од ЕУ велат, добро вие ги исчистивте судовите и обвинителствата од корупција, но немате Уставен суд. Сметам дека доцнењето на комплетирањето на Уставниот суд не треба да биде проблем за почеток на преговорите“, додава Рама.
Тој посочи дека неговата земја „не очекува да станеме членка на ЕУ идната недела и ние тоа го знаме, туку бараме почеток на преговорите со кои за 10 години би станеле членка на ЕУ, а во тој период нека нè оценуваат“.