Претседателот на Каталонија, Карлес Пучдемон, вечерва рече дека ќе прогласи независност доколку резултатот на референдумот биде „да“.

„Со овој ден на надеж и страдање, жителите на Каталонија се изборија за правото да имаат независна држава во форма на република. Ние, Каталонците, заслуживме да не слушне Европа. Европската Унија веќе не може да го игнорира кршењето на човекови права, што го следеше референдумот. Шпанската влада испиша срамна страница во своите односи со Каталонија“, изјави Пучдемон во телевизиско обраќање.

Резултатите од гласањето допрва треба да бидат објавени, а откако ќе се случи тоа, тој рече дека веднаш ќе ги проследи во парламентот, кој за денеска најави вонредна седница. Мадрид од старт го прогласи референдумот за неуставен и најави дека нема да ги признае резултатите.

Тој претходно ги обвини шпанските власти дека користат неоправдано, диспропорционално и неодговорно насилство во обидите да го спречат референдумот.

Регионалното министерство за здравство соопшти дека 844 цивили се повредени во судирите во неделата, додека шпанското министерство за внатрешни работи изјави дека и 33 припадници на полицијата и на цивилната гарда побарале лекарска помош.

Тензичната ситуација на гласањето на референдумот за независност на Каталонија траеше до крај на вечерта. На социјалните мрежи се објавуваа видеа од шпанската полиција како брутално ги напаѓа и ги тепа гласачите кои дошле да гласаат на референдумот. Полицијата по гласачите пукаше и со гумени куршуми.

Премиерот на Шпанија, Маријано Рахој на прес-конференција рече дека денеска не се одржал референдум. Рахој во својот говор не ги спомена повредените граѓани и ја напушти говорницата без да одговори на новинарските прашања.

Шпанската влада побара од каталонскиот претседател да ја прекине референдумската фарса и рече дека „неговиот тим е единствено одговорен за сето она што се случи“. Шпанскиот министер за внатрешни работи изјавил дека 12 полицајци се повредени, а три лица биле уапсени. Како што рече, досега затворени биле 92 гласачки места.

Против оваа полиција, биле поднесени голем број тужби, затоа што и покрај барањата на шпанската централна власт да спроведат судска забрана за референдумот, гласачките места не биле затворени.

Во соопштението на Вишиот суд во Каталонија се вели дека тужбите се поднесени против каталонската полиција позната како Мосос, а поради отсуство на акции на гласачките места кои биле незаконски отворени заради гласање, се вели во соопштение од судот. Каталонскиот Виш суд нагласува дека од полицијата Мосос побарале повеќе информации во врска со тужбите.

Повеќе за тоа како се одвиваа подготовките и како течеше референдумот можете да прочитате на следните линкови.

Над 760 граѓани повредени на референдумот во Каталонија

Како дојде до референдумот во Каталонија и што по него

Брутална употреба на сила во Каталонија

Каталониски пожарникари ги штитат граѓаните од полицијата

Шпанската полиција ги чисти училиштаата од активисти

Шпанија пред голем тест: Каталонија бара независност на референдум