За Нова ТВ од Букурешт: Сашко Ѓ. Димовски
Жал за поразот од Австрија, па мечот со Украина во четврток доаѓа шанса за вадење и задржување на шансите за минување на групата и пласман во нокаут фазата на 16. Европското првенство во фудбал. Ова е сублимат од импресиите на дефанзивецот Кире Ристевски кој вчерашниот настап на „црвено-жолтите“ во Букурешт го проследи од клупата.
– Се претставивме во добро издание и штета е што загубивме. Се надевам дека ќе биде поинаку против Украинците и подготвени сме да изгинеме на терен за поволен резултат со кој би ги израдувале и направиле горди нашите фанови, рече новиот стопер на кипарски АЕЛ Лимасол.
Против Украина, Ристевски очекува сличен меч како со Австрија. Наредниот ривал на Македонија на ЕП 2020в го опиша како агресивен тим кој сака да наметне свој стил и ритам на игра. Дека е во право за Украинците, се виде и во нивниот настап на „Јохан Кројф“ арена во Амстердам во кој со два прекрасни гола израмнија на „лалињата“, но, сепак, не успеаја да задржат бод.
Ристевски истакна дека бил полн со емоции при интонирањето на македонската химна на Националната арена во Букурешт, но, иако ја почитува одлуката на селекторот, сепак изрази жалење што останал на клупата за резервни фудбалери, иако статистички е најдобриот македонски дефанзивец во квалификациите.
– Селекторот реши да останам на клупа и ја почитувам неговата одлука. Имав прилика да го видам мечот и, гледајќи од страна, може да кажам дека соиграчите одиграа добар натпревар со Австрија. Ќе нема штедење ниту против Украина, ќе излеземе на терен со намера да се бориме до последен атом на силите, со надеж дека ќе успееме до позитивен резултат со кој би ги израдувале навивачите и би останале конкурентни за минување на групната фаза на првенството. Подготвени сме за македонска борба и за украинска агресивност, додаде Ристевски.