Се интензивираат преговорите за решавање на спорот со Грција. Премиерот Зоран Заев вчера потврди дека следната недела ќе се одржи нова средба на министерско ниво во рамките на процесот за преговори со посредништво на медијаторот Метју Нимиц.
Министрите за надворешни работи на Македонија и на Грција, Никола Димитров и Никос Коѕијас како што објави балканската новинска агенција ИБНА, а пренесе МИА ќе се одржи во Софија, 15 и 16 феваруари, на маргините на неформалната средба на шефовите на дипломатиите на земјите од ЕУ и државите кандидати за членство
Се очекува Димитров и Коѕијас да разговараат за следните чекори во процесот за решавање на спорот за името меѓу двете земји.
Најавите за интензивирање на процесот за решавање на прашањето за името следуваат по последните изјави на Заев дека Скопје може да прифати географска одредница, како и на Владата во Атина дека останува активно ангажирана во процесот.
Од Кабинетот на Иванов вчера потврдија дека претседателот на Република Македонија не е информиран за каков било постигнат договор меѓу македонскиот и грчкиот премиер од нивната средба во Давос, на кој договор се темелат јавните изјави на министерот за надворешни работи на Грција.
По промената на името на скопскиот аеродром, грчките медиуми не ја исклучуваат можноста шефот на грчката дипломатија да го посети Скопје. Коѕијас изразил желба да биде првиот кој од Атина, авионски би дошол во Скопје, но како што објави МИА, сепак за тоа нема потврда.
Останува отворено прашањето дали евентуалното патување од Атина во Скопје, би било со грчки владин авион или пак со лет на грчката компанија Аегеан аирлинес, која пред четири месеци, официјално најави дека Скопје е една од новите дестинации што се воведуваат во 2018 за директни летови од Атина.
Шилегов во Атина
Градоначалникот на Скопје, Петре Шилегов и градоначалникот на Атина, Јоргос Каминис, в петок во Атина ќе имаат официјална средба, а во пресрет на неа, во заедничка колумна дадоа одговори на многу отворени прашања за актуелната политичка состојба во двете држави.
Заедничката колумна е објавена во утрешните изданија на македонскиот дневен весник „Слободен печат“ и грчкиот дневен весник „Ta Nea“.
– Во текот на изминатите неколку недели беа направени важни чекори и беше направен моментум за решавање на спорот кој ги дели нашите држави со децении. Ова кулминираше со неодамнешниот конструктивен состанок помеѓу двајцата премиери во Давос, што доведе до изрази на надеж и охрабрување кај нашите народи дека оваа историска можност нема да се пропушти повторно. Ние, како градоначалници на главните градови на двете земји, ги здружуваме нашите гласови и го поддржуваме процесот што мора да води кон остварливо решение, а не кон ново разочарување, велат Шилегов и Каминис во колумната.