Горан Пандев го постигна вториот гол во Серија А во новата сезона. Капитенот на македонската репрезентација погоди против Киево во победата на Џенова со 2:0 која со овие три бода се искачи на осмата позиција на табелата по шест одиграни кола во фудбалскиот шампионат на Италија.
Пандев беше во стартниот тим на џеновјаните и одигра 56 минути против фенерџијата на табелата. Две минути пред да биде заменет, го совлада Сорентино и на излегување од игра ги собра аплаузите на „Луиџи Ферарис“ стадионот. Претходно реализира и во мечот со Сасуоло што Џенова го загуби со 3:5.
https://www.youtube.com/watch?v=gC055qksRbs
Јувентус останува единствен тим со максимален ефект во Италија во тековното првенство. „Старата дама“ има шест победи во исто толку одиграни средби, откако вечерва со 2:0 пред своите гледачи славеше над Болоња. Трите бода на „Јуве арена“ беа сочувани со головите на Дибала во 12. минута и Матуиди, по асистенција на Роналдо, во 16. минута.
https://www.youtube.com/watch?v=_CjR02B_G4Y
Убедлив триумф забележа и Наполи над Парма со 3:0. Инсиње во четвртата минута и Милик во 47. и во 85. беа творци на петтата првенствена радост на наполитанците во сезоната кои остануваат да дишат во врат на актуелниот првак во калчолигата.
https://www.youtube.com/watch?v=pn0Divi17Fc
Најубедлива, пак, беше Рома која по серијата лоши резултати се „истури“ на Фросиноне. Конечни 4:0 за „волчицата“ која ја заврши работата на „Олимпико“ во првото полувреме. Ундер во втората минута, Пасторе во 28. минута и Ел Шарави во 35. минута ја решетаа гостинската мрежа до одморот, а печат на, само, втората победа на римјаните во сезоната стави Коларов во 87. минута.
За Рома ова беше прва победа по шест меча вклучувајќи го и оној против Реал Мадрид во Лигата на шампиони. Во меѓувреме, во Серија А, загуби од Болоња (0:2), од Беневенто (1:2), од Милан (1:2) и ремизира со Киево (2:2) и со Аталанта (3:3).
Серија А, 6 коло
Јувентус – Болоња 2:0
Наполи – Парма 3:0
Рома – Фросиноне 4:0
Џенова – Киево 2:0
Аталанта – Торино 0:0
Калјари – Сампдорија 0:0
Удинезе – Лацио 1:2
Интер – Фиорентина 2:1
СПАЛ – Сасуоло (четврток, 19 ч.)
Емполи – Милан (четврток, 21 ч.)
Табела: Јувентус 18, Наполи 15, Лацио 12, Фиорентина 10, Сасуоло 10 (-1), Интер 10, СПАЛ 9 (-1), Џенова 9 (-1), Сампдорија 8, Рома 8, Удинезе 8, Парма 7, Аталанта 6, Торино 6, Калјари 6, Милан 5 (-2), Емполи 4 (-1), Болоња 4, Фросиноне 1, Киево -1.