Илјадници Белгијци денеска маршираа низ Брисел во знак на протест против владините ограничувања за ширење на новиот бран на пандемијата

Извикувајќи „слобода, слобода“, луѓето протестираа пред зградата на Европската Унија. Дел од нив носеа транспаренти со критики за вакцините и воведувањето на задолжителна вакцинација.

Протестите започнаа по најавата на премиерот Александар де Кроа, кој во петокот рече дека градинките и основните училишта ќе бидат затворени седум дена пред почетокот на божиќните празници, додека децата постари од шест години мора да носат маски.

Премиерот посочи дека 40 отсто од креветите на одделенијата за интензивна нега се пополнети со пациенти заразени со коронавирус. Ова е трета недела како се заоструваат епидемиолошките мерки. Земјата веќе ги затвори ноќните клубови и побара од работниците да работат од дома доколку можат.