Петкратно се зголемува бројот на антитела во организмот по една недела од примање на четврта доза на вакцина против ковид-19, рече денеска израелскиот премиер Нафтали Бенет, кој се повика на прелиминарни резултати на студија спроведена во земјата.
Со сигурност знаеме дека четвртата доза е сигурна по една недела од нејзиното аплицирање, изјави Бенет во медицинскиот центар Шеба.
Шеба, во рамки на својата студија, дава втора засилувачка доза на својот персонал во екот на пораст на инфекции со омикрон сојот на коронавирус.
Втората добра вест е што по една недела од примање на чертвата доза, бројот на антитела кај вакцинираното лице се зголемува за пет пати. Тоа е значителен пораст против вирусот, хоспитализацијата и развојот на тешки форми на болеста, додаде Бенет пред новинарите.
Израел има водечка улога во проучувањето на ефектите на вакцините против ковид-19, како земја која најбрзо го имунизира најголемиот дел од населението пред една година и една е од првите земји која почна да дава трета доза на своите граѓани.
Моментно изралеските жители над 60-годишна возраст, здравствените работници и имунокомпромитираните пациенти се имунизираат и со четврта доза со вакцината на „Фајзер“/„Бајонтек“.