Портпаролот на Талибанците синоќа соопшти дека Кина ветила оти ќе ја задржи својата амбасада во Авганистан и ќе ја зголеми помошта за земјата која е разурната од деценискиот конфликт, пренесува агенцијата Бета.
Абдул Салам Ханафи, член на политичкото биро на исламистичката група во Доха, „имаше разговор со Ву Јианг, заменик -министер за надворешни работи на Народна Република Кина“, напиша портпаролот Сухаил Шахин на Твитер.
Кинескиот заменик министер нè увери дека неговата земја ќе ја задржи амбасада во Кабул, додавајќи дека нашите односи ќе растат. Кина, исто така, ќе ја зголеми и хуманитарната помош, особено за лекување на ковид-19, додаде тој.
Портпаролот Забибулах Муџахид за италијанскиот весник „Ла Република“ вчера ја потенцира важноста на односите со Кина.
Кина е наш најважен партнер и претставува фундаментална и извонредна можност за нас, затоа што е подготвена да инвестира и да ја обнови нашата земја, подвлече Муџахид.
Тој додаде дека Новиот пат на свилата, инфраструктурна иницијатива со која Кина сака да го зголеми своето глобално влијание со отворање трговски рути, се смета за многу важна меѓу талибанците.