УНЕСКО, Европската комисија и Канцеларијата на ОБСЕ за демократски институции и човекови права (ОДИХР) започнуваат двегодишен проект за справување со антисемитизмот во Европа преку образование, во време кога еврејските заедници чувствуваат зголемена закана.
Новото партнерство е предводено од УНЕСКО и финансирано од Европската комисија со поддршка на Канцеларијата за демократски институции и човекови права на Организацијата за безбедност и соработка во Европа (ОБСЕ), соопшти УНЕСКО.
Проектот ќе се спроведува во 12 земји-членки на ЕУ, меѓу кои Хрватска, Словенија, Италија, Австрија, Франција и Германија.
Образованието е основно за справување со омразата и предрасудите. Наша заедничка одговорност е да ја искористиме неговата трансформативна моќ за да ја изградиме отпорноста на наставниците, училиштата и младите против антисемитизмот. Со тоа, оддаваме почит на споменот на оние кои страдаа од него и нека процветаат сите наши општества, вклучително и еврејската популација, истакна Стефанија Џанини, помошник генерален директор за образование на УНЕСКО.
УНЕСКО ќе соработува со локалните власти за обука на наставници, креатори на политики и граѓански организации за борба против антисемитизмот преку образовниот систем, соопшти агенцијата на Обединетите нации.
Изградбата на Европа без омраза и антисемитизам започнува во училницата, изјави по тој повод потпретседателката на ЕК, Маргаритас Схинас.
Целта е да се зајакне капацитетот на образовните системи за справување со проблеми како што се теории на заговор, антисемитски предрасуди и стереотипи и говор на омраза на Интернет и да се одговори на антисемитски инциденти.
Извештајот од март оваа година на еврејската организација B’nai B’rith International, основана во 1843 година, покажува дека „агресивните собири шират антисемитски и екстремистички идеологии“ низ Европската Унија, глорифицирајќи ги злосторствата на Холокаустот.
На интернет се шират и антисемитизам и искривување на Холокаустот, а статистиката е „алармантна“, предупредува организацијата.
Студијата на УНЕСКО од 2022 година покажува дека во просек 16 отсто од објавите на социјалните мрежи за Холокаустот ја фалсификуваат историјата, а процентот се зголемува на 49 отсто на апликацијата Телеграм.
Истражувањето на ЕУ во периодот меѓу 2020 и 2021 година покажа седумкратно зголемување на антисемитските објави на франкофонските кориснички сметки на социјалните мрежи и тринаесеткратно зголемување на сметките на германски јазик, се вели во соопштението на УНЕСКО.
Новото истражување на технолошката компанија CASM Technology и институтот ISD од март 2023 година покажува дека бројот на антисемитски објави на Твитер двојно се зголемил за само три месеци откако се променила сопственичката структура на социјалната мрежа. Мултимилијардерот Илон Маск го купи Твитер кон крајот на октомври минатата година.
Како агенција на ОН со мандат да ја заштити слободата на изразување, УНЕСКО затоа ќе спроведе серија глобални консултации со владите, регулаторните тела, граѓанското општество и приватниот сектор за да развијат упатства за регулирање на дигиталните платформи, се вели во соопштението.
Целта е да се санкционира ширењето на дезинформации, теории на заговор и говор на омраза на Интернет, а истовремено да се заштити слободата на говорот и другите човекови права.
УНЕСКО ќе спроведе истражување и на темата јудаизам и антисемитизам во училишните учебници и ќе ја испита подготовката на наставниците за оваа тема, по што ќе даде препораки до европските членки.