Претседателот на Собранието Талат Џафери вели дека денешната порака од Брисел дека Македонија ќе добие покана од НАТО за членство на Самитот во јули е најважната вест што земјава ја добила во изминатите три децении од независноста. Сега, вели Џафери треба да се спроведе спогодбата со Грција според предвидената динамика – референдум, па уставни измени.
За препораката на Европскиот совет за отпочнување на преговори во јуни наредната година, Џафери вели дека до тогаш ќе треба да се формираат тимовите што ќе ги водат преговорите и да започне скриниг процесот за усогласеноста на македонското законодавство со европското.
Лошата пракса на Иванов мора да прекине
Претседателот на Собранието најави дека на 5 или на 6 јули ќе ја закаже седницата на која пратениците повторно ќе треба да гласаат за Договорот со Грција, откако шефот на државата одлучи да не го потпише Указот за прогласување. Денеска до пратениците ќе го достави писмото од Иванов во кое тој образложува зошто нема да стави потпис.
„Доколку и по втор пат не го потпише Указот, ова ќе стане лоша пракса, која мора да ја прекинеме. Иванов мора да прекине да ги узурпира своите надлежности, бидејќи нема право на апсолутно вето. Собранието има надлежност да ја спроведе волјата на избраните пратеници, а сите институции се должни да го спроведат и почитуваат Уставот.
Тој рече дека ако Иванов не го потпише законот, ќе се употреби исто решение и за Договорот, но и за Законот за употреба на јазиците.
Едно од решенијата е тие да бидат испратени во Службен весник без потпис на претседателот Иванов.
Рокот за избор за нови членови на ДИК е пробиен
Денеска беше последниот рок до кога требаше да биде избран новиот состав на Државната изборна комисија – рок кој партиите со консензус го изгласаа, но не го спроведоа. Во новиот Закон за избор на членови на Државната изборна комисија пишува дека во рок од триесет дена по изгласувањето на Законот треба да биде избран новиот состав на Државната изборна комисија. Но, до денеска не е свикана ниту седница на комисијата за избори и именувања, а партиите не доставија свои предлози за членови и пртеседател на комисијата која треба да го спроведе референдумот. Од СДСМ и од ВМРО ДПМНЕ велат дека разговорите траат и дека најверојатно на почетокот на наредната недела ќе има договор.
Претседателот на Собранието Џафери најави дека седница за избор на членови на ДИК ќе закаже на 17 јули, но напомена дека доколку има известување дека составот на ДИК поминал на комисијата за избори и именувања, по итна постапка ќе закаже седница во рок од 10 дена.
По изборот на ДИК, треба да се изгласа и одлуката за распишување на референдумот кој најверојатно ќе се одржи на крајот на септмеври. Оваа одлука, Џафери објаснува дека мора да биде донесена најдоцна до крајот на јули за да се испочитува законскиот рок од 60 дена – од денот на распишување на референдумот до неговото спроведување. Џафери нема дилеми околу постапката за референдум кој треба да се спроведе на ист начин како за избори.
„За спроведувањето на референдумот треба да направиме аналогија со изборниот Законик“ вели Џафери во врска со забелешките дека дел од одредбите во Законот за референдум не се усогласени со Изборниот законик.
Во однос на гласањето на дијаспората, Џафери вели дека „референдумот не се спроведува надвор од границите на нашата држава“, но доколку некој од дијаспората сака да гласа, може да дојде во Македонија.
За уставните измени кои според Договорот со Грција треба да се спроведат по референдумот, Џафери вели дека целата постапка трае околу 4 месеци и има шанси рокот да биде испочитуван, а целата постапка да зварши до крајот на годината.
„Од бројот на амандмани ќе зависи колку ќе трае постапката. Ако се почне на почетокот на октомври, може да се стигне до крајот на годинава и да се исполни Спогодбата“ кажа Џафери.