Нешто по 20 часот пред Домот на Народното Собрание на Србија почна протест на незадоволни граѓани по најавените мерки за спречување на ширењето на коронавирусот што попладнево ги најави претседателот Александар Вучиќ. Демонстрантите во еден момент успеаја да влезат во зградата, но набрзо беа исфрлени од полициските сили. Притоа, според белградските медиуми, е приведено едно лице поради особено агресивно однесување кон припадничка на жандармеријата.
Протестите, според медиумите во Србија, почнаа по најавениот „полициски час“ од петок до понеделник во Белград. Еден од демонстрантите, пак, пред камера рече дека народ излегол на улица затоа што не сака да дозволи населување на мигранти во Србија.
https://www.youtube.com/watch?v=u_vMCPmVn5g
Како што пренесува агенцијата „Танјуг“, протестот по 22 часот излегол од контрола. Насобраните лица ја пробиле заштитната ограда пред Собранието, палеле димни бомби на што полицијата одговори најпрво со повлекување, а потоа и со фрлање на солзавец. Но, тоа не ги одврати демонстрантите од намерата, па продолжија со фрлање камера, лименки во новиот налет за влез во парламентот.
Слободан Георгиев, новинар на „Њузмаксиа Адрија“, кој се јави во вестите на телевизија Н1 рече дека насилниот упад во зградата на српското Собрание е предводен од десничари. Притоа напомена дека граѓаните не се незадоволни само од најавените мерки против Ковид-19, туку има и такви кои се иритирани од денешниот говор на Вучиќ во делот за Косово во што препознале дека „наскоро ќе биде продадено“.