снимател: Трајче Антоновски

Нема услови за фер избори без прочистен Избирачки список и тоа е една од причините поради кои остануваме на улица, порачаа и на денешниот протест учесниците во Шарената револуција во Скопје.

Целта кон која се насочи револтот денеска беше зградата во која е сместена Државната изборна комисија (ДИК), а врз која завршиај балони во различни бои.

-Избори со ваков избирачки список не може да има. Над 300 илјади лица во Избирачкиот список се сомнители. Од нив, само 80 илјади беа теренски проверени, над 40 илјади лица не беа пронајдени никаде. Фантоми ли се, што ли се? Да не ги коментираме и гласачите од Пустец. Над 120 илјади гласачи воопшто не беа предмет на теренска проверка. Kога ДИК ќе ги проверува, има ли време до 5. јуни?, рече една од присутните демонстранти.

Протестот традиционално започна пред Специјалното јавно обвинителство. Таму поддршка на демонстрантите им даде и поранешниот евроамбасадор во Македонија Ерван Фуере, кој истакна дека невозможно е да се одржат избори во ваква ситуација, затоа што треба да се спроведат неопходните реформи, меѓу кои се и регулацијата на медиумите.

-Ги поддржувам овие луѓе кои достоинствено протестираат против кршењето на владеењето на правото и повредата на човековите права, кои се случуваат во земјата, рече Фуере.

Според него одлуката за аболција Иванов мора да ја повлече со цел да се обезбеди непречена работа на Специјалното обвинителство.

Освен Фуере, поддрша на граѓанските протести дадоа и функционери од опозициската СДСМ,д одека на протестот можеа да се забележат граѓани од најразлична возраст.

Со знамиња и свирежи, тие традиционално протестот го започнаа пред Специјалното јавно обвинителство. Оттаму под транспарентот „Државен изборен криминал – #протестирам“.

Оттаму колоната го продолжи маршот кон Народната канцеларија на Иванов, поминаа и покрај Собранието и Агенцијата за медиуми  за да завршт пред Државната изборна Комисија.

Објектите беа под засилено полициско обезбедување, а дел од демонстрантите и денеска не се откажаа од молбата кон полицијата да ги спушти штитовите и да се приклучи на протестите.

Со цел да се заштита полицајците од боја, демонстрантите понудија заштитни наметки за кордот пред ДИК, но откако полицијата ги одби, дел од бојата заврши врз нивните штитови.

Свирежи и негодување имаше и за службениците на МВР кои внатре од зградата на ДИк го снимаа целиот протест, додека ходникот на објектот беше преполн со специјалци.

Нешто по 20 часот демонстрантите ја напуштија улицата пред ДИК, а на неа останаа испишаната парола „Крајот е шарен“.

Граѓаните обединети под движењето #Протестирам  бараат повлекување на одлуката за аболиција и оставка на претседателот Ѓорѓе Иванов, формирање на специјално одделение на Кривичниот суд за предметите на Специјалното јавно обвинителство, како и повлекување на одлуката за одржување на парламентарни избори на 5 јуни. Дел од барањата се и  вклучување на граѓанското општество во решавање на кризата и формирање на преодна влада.

По протестот пред ДИК, дел од граѓаните се упатија пред Владата, а потоа и мирно се разотидоа.

Атмосферата од денешниот протест хронолошки може да ја погледнете во видеото кое го подготви екипата на НОВА.