Остра реторика од Белград по изјавата на македонскиот претседател Стево Пендаровски за косовскиот весник „Газета Експрес“ дека е против идејата за менување на границите меѓу Србија и Косово. Со реакција се јави српскиот министер за одбрана Александар Вулин кој за тамошните медиуми истакна дека „никој не го прашува претседателот на Северна Македонија по тоа прашање“.
„Претседателот на Северна Македонија може слободно да молчи на јазикот кој никој, освен Србија, не го признава. А, на останатите јазици може уште погласно да молчи, бидејќи ниту некој бара мислење од него, ниту го прифаќа“, истакна Вулин.
Пендаровски, како што објави „Газета Експрес“, рекол дека „ги поддржува напорите на Европската Унија и на САД за компромисно решение меѓу двете земји што би имало цврста меѓународна гаранција која истовремено би придонела за стабилноста на регионот“.
Српската национална телевизија РТС ја пренесе изјавата на Билјана Радева, портпаролка на претседателот Пендаровски, за косовското издание на „Газета Експрес“. Во неа се вели „претседателот Пендаровски верува дека решенија, кои можат да доведат до промена на границите и размена на територии и луѓе, може да имаат штетно влијание врз регионот и врз сеопфатните напори што се вложуваат во постконфликтното опоравување на регионот и изградбата на одржливи мултиетнички општества“.
Како што пренесува РТС, во неа се додава дека „Пендаровски разбира оти може да постојат различни гледишта и ставови за решение и апелира до двете страни да изградат меѓусебна доверба за намалување на тензиите и за постигнување на напредок во дијалогот“.