Премиерот Зоран Заев денеска потврди дека размислува и за реконструкција на владиниот кабинет, но и зголемување на бројот на парламентарното мнозинство.
-Да, прво ќе има реконструкција, затоа што пред се ќе расте бројот на пратеници во пратеничката група. Разговараме со дополнителни пратеници. Мислам дека треба да овозможиме стабилизирање на парламентот, од повеќе аспекти. Јас се надевам дека и опозицијата ќе се врати брзо во парламентот, но и вкупниот број на пратеници од парламентарното мнозинство би требало да биде посоодветен, за да може да нема вакви прекини на сендиците, паузи, собирање на пратениците или слично. Верувам дека ќе успееме со тоа, а поради тоа ќе се случи секако и реконструкција, изјави Заев.
На новинарско прашање, зошто во Владата има функционери кои девет месеци не покажале ниту резултати, ниту волја за тоа, Заев рече им упатил порака да се поправат, во спротивно ќе бидат сменети.
– Јас ја испратив пораката за да може некој и да се поправи. Апсолутно ако некој заслужува смена веднаш тоа се прави. Без разлика дали е од пониските ешалони или од повисоките. Очекуваме секако да се случуваат и реконструкции и промени во соодветни временски периоди кога се прават рекапитулари од секој можен аспект. Огромен е бројот на луѓе во Владата кои и знаат и се трудат. Исто така голем е бројот на луѓе во Владата кои што многу се трудат, а не знаат, но се трудат и да научат. Има еден дел кои што ниту знаат ниту се трудат. Јас апелирам до сите. Ние сме сервис на граѓаните, поради тоа сме поставени, да се посветиме максимално на потребите на граѓаните. Ова кое што го имаме добиено од нив е чест и одговорност, која што немал секој можност да ја добие. Од тој аспект навистина апелирам до сите, за навистина максимално и посветено извршување на своите задачи, одговори Заев.