Според руското МНР, констатациите на американскиот потпретседател Мајк Пенс, изнесени за време на посетата на Црна Гора, се несоодветни и само го покажуваат ладнокрвниот менталитет на Вашингтон.
Според Москва, обвинувањата дека Русија сакала да го дестабилизира Балканот и да го оттргне од својата НАТО агенда, биле лажни и го дестабилзирале јужниот дел на Европа.
Руското МНР во официјално соопштение уште потенцира дека Пенс кон државите од Балканот наметнал избор „или со Запад или со Русија“ а со тоа само ја покачувал тензијата во регионот.
– Ги повикуваме нашите колеги од Америка да прекинат да ја клеветат Русија и нејзината надворешна политика која се заснова на почитување на нашите партнери и конструктивна соработка во однос на меѓународниот интерес, се вели во соопштението на руското МНР.
Пенс за време на својата прес-конференција во Подгорица, рече дека Русија сакал да испише нови меѓународни граници на сила и дека Западен Балкан е регионот кој Москва сака да го дестабилизира и да го оттргне од својата ориентација кон НАТО и ЕУ.
Неодамна и генералниот секретар на НАТО, Јенс Столтенберг, изјави дека односите меѓу НАТО Алијансата и Русија се влошени и можеби најлоши од Студената војна наваму.
„Мислам дека е исправно ако се каже дека односите меѓу НАТО и Русија се во најтешка фаза од Студената војна наваму“, изјави Столтенберг.
Истото го потврди и претседателот на САД, Доналд Трамп, но кој вината ја посочи во американскиот Конгрес, оттргнувајќи било каква вина од себе за влошените односи меѓу САД и Русија.