Претседателот на Европската комисија Жан Клод Јункер и еврокомесарот за проширување Јоханес Хан донесоа порака со потврда на европската иднина на Македонија, за реалните можности земјата да добие препорака за членство оваа година, но секако доколку продолжи да чекори по патот на кој се наоѓа во моментов, интензивно спроведување на реформите и подобрување на добрососедските односи.
Јункер на заедничката прес-конференција со Заев истакна дека во земјава не пристигнал за да соопшти точен датум за почеток на преговорите, но напомена дека Македонија е на добар пат, постигнала напредок и оти ако продолжи да се движи во таа насока за неколку месеци може да го добие очекуваното и препораката нема да биде условена.
– Не дојдовме да ви соопштиме датум, туку да ви кажеме дека сте на добар пат и ако продолжите по тој пат за неколку месеци ќе и дадете можност на Европската комисија на Советот да му препорача отпочнување на преговорите за приклучување, рече Јункер.
На македонските власти им порача да го решат спорот за името со нивните грчки пријатели. Гледа напредок во процесот, а како доказ за тоа му биле измените на аеродромот, по одлуката да Владата тој да биде преименуван, како знак на отстапка во процесот на преговорите.
Премиерот уште еднаш повтори дека Владата прифаќа географска одредница, но и достоинствено решение, а исто така останува посветена и на подобрување на добрососедските односи генерално.
– Инсистираме на решение, кое ќе биде трајно, но и ќе го почитува достоинството и ќе го заштити идентитетот на двете држави, рече Заев.
Изрази силно уверување дека во јуни 2018 година Советот ќе донесе одлука за почеток на преговорите.
По средбата со Заев, претседателот на ЕК, Јункер и евркомесарот Хан имаа средба и со македонскиот претседател Ѓорге Иванов.
-Ја поздравуваме подготвеноста од Европската Комисија за обновување на препораката врз основа на исполнетите критериуми од наша страна, изјавил Иванов, дополнувајќи дека деблокирањето на интегративните процеси, преку соодветното вреднување на нашиот напредок, позитивно ќе влијае врз реформските процеси и врз целата општествено-политичка состојба во Република Македонија.
Од опозициската ВМРО ДПМНЕ, коментирајќи ја посетата на претседателот на Европската Комисија во Македонија, ВМРО-ДПМНЕ преку соопштение го прашаа премиерот Зоран Заев дали Жан-Клод Јункер го информирал за „политичката тортура која се спроведува во државата, неоснованите притвори и монтираната истрага против десетина лица за тероризам“.
Македонија е првата дестинација во рамки на турнејата на Јункер низ земјите од Западен Балкан, за да ја презентираат Стратегијата за проширување на Унијата со земјите од регионот. Од Македонија тие заминаа за Албанија. До 1 март ќе ги посетат сите шест земји од Западен Балкан.