Според пратеникот од ДУИ, Талат Џафери, претседателот Ѓорѓе Иванов треба да му го додели мандатот на лидерот на СДСМ, Зоран Заев за да се обиде да состави влада.
Во интервју за косовската ТВ Дукаѓини, меѓу другото, Џафери вели Иванов иако е претседател на државата, работи под влијание на ВМРО-ДПМНЕ.
„Иванов треба да размислува за она што е демократска и парламентарна пракса. Тој треба да работи врз основа на тоа, а не да ги извршува партиските налози на ВМРО-ДПМНЕ“, изјави Џафери.
Оваа изјава на Талат Џафери, која ја пренесуваат медиумите, доаѓа откако партијата на Груевски и Али Ахмети не договорија состав на влада со потребното мнозинство до предвидениот рок.
Деновиве се се врти околу следната постапка на Претседателот, кој пак соопшти дека врши консултации.
Додека лидерот на Социјалдемократскиот сојуз, Зоран Заев на прес-конференција изјави дека очекува според Уставот, Иванов да му дозволи преку мандатот да се обиде да состави влада, ВМРО-ДПМНЕ по неуспешните преговори порача дека очекуваат нови избори, бидејќи според нив мандатот не треба да му се даде на Заев.
Меѓу другото, ВМРО-ДПМНЕ упати барања за одговори до американската Амбасада и до портпаролката на Европската комисија, Маја Коцијанчиќ да ги објаснат нивните ставови во контекст на формирањето на новата влада.
ДР-ДПА во меѓувреме информираше дека доколку се оди на нови избори, тие ќе ги бојкотираат, предупреди Зијадин Села, според кој, така само би се продлабочила политичката криза наместо да се реши.
Движењето Беса која по изборите на 11.декември влезе во Парламентот, реагира дека фокусот сега треба да се стави на формирање стабилна политичка влада.