Европската Унија (ЕУ) ќе соработува со талибанците под строги услови, но тоа не значи дека ќе ја признае новата авганистанска влада, порача денеска шефот на европската дипломатија, Жосеп Борел.
За да му помогнеме на авганистанскиот народ, ќе мора да соработуваме со новата влада во Кабул што не значи признавање. Тоа ќе биде оперативна соработка, изјави Борел на прес-конференцијата во Брдо, Словенија, пренесува „Ројтерс“.
Борел додаде дека соработката ќе се зголемува во зависност од однесувањето на авганистанската влада, на пример „ако Авганистан не биде база за извоз на тероризам во други земји“ и ако ги почитува човековите права, владеење на правото и медиумите.
Авганистан, исто така, ќе мора да формира инклузивна, репрезентативна преодна влада, да овозможи слободна достава на хуманитарна помош и да дозволи на странските државјани и на Авганистанците кои се изложени на ризик од одмазда да ја напуштат земјата.
Велика Британија, исто така, порача дека нема да ја признае талибанската влада.
Наш пристап е да не ги признаеме талибанците како влада. Велика Британија обично признава држави, а не влади. Ја разбираме важноста за соработка и директните линии на комуникација. Талибанците презедоа низа чекори, некои позитивни на зборови. Мора да ги тестираме и да видиме дали ќе бидат преточени и во дела, нагласи британскиот министер за надворешни работи, Доминик Раб за време на посетата на Пакистан.
Раб дополни дека Велика Британија ја деблокирала првата транша од 30 милиони фунти за хуминатарна помош за соседите на Авганистан кои се соочуваат голем мигрантски бран. Тој, исто така, истакна дека и буџетот за помош на Авганистан е зголем на 286 милиони фунти, но и дека идните исплати ќе одат преку хуманитарни организации.