Премиерот Ковачевски и вицепремиерот Груби се меѓу осумтемина лица за кои Министерството за внатрешни работи (МВР) бара кривична одговорност за наводен криминал вреден 8 милиони евра во Државната лотарија.
Од Обвинителството информираат дека досега не се собрани доволно докази за отворање на истрага против Премиерот и поранешниот владиниот секретар. Сепак, Груби и неговиот поранешен соработник, екс-директорот на Лотаријата Перпарим Бајрами, не ја имале истата среќа.
„Од собраните докази произлегува основано сомнение дека двајцата соизвршители, како одговорни лица во АД Друштво за приредување игри на среќа “Државна лотарија” на РСМ, во текот на 2023 година, преку своите посебни овластувања и должности, учествувале во дејствија кои довеле до штета за акционерското друштво, со намера да прибават противправна имотна корист за друга страна, која се проценува на значителен износ од 501.319.119 денари од буџетот на акционерското друштво“, се наведува во соопштението на Обвинителството.
Покрај Груби и Бајрами, Обвинителството продолжува со собирање докази и за уште четири лица кои биле дел од комисиите за јавни набавки, под сомнение дека сите заедно спроведувале тендери за набавка на апарати за коцкање, спротивно на законските прописи.
Од вчера, Груби и Бајрами не се достапни за органите на прогонот. По извештаите дека избегал во Косово, Груби вчера вечерта се огласи на социјалните мрежи.
„Денеска патував за приватна посета. Ве молам немојте да измислувате и шпекулирате. Редовно патував со моите патни исправи и моето лично полициско обезбедување. Веднаш штом ќе ги завршам обврските, ќе се вратам дома кај моето семејство“, напиша Груби.
Меѓутоа, Тошковски тврди дека Груби не заминал редовно и открива дека полициските службеници на границата со Косово направиле пропуст. Тој го повика Груби да се врати во Македонија.
Ниту Министерството за внатрешни работи, ниту Обвинителството не објавуваат детали за тоа како точно се проневерени 8 милиони евра. Според неофицијални информации, се работи за тендер за набавка на машини за игри на среќа.